वाइवाइ चाउचाउ नं तौल क्वपाल, मू थकाल
नेवा: अनलाइन न्युज – ललेन्द्र शाक्य | २०७९ श्रावण २२, आइतबार १२:०१:२२
आः फुक्कसिगु छ्यं स्यानाच्वंगु विषयस खः, अप्वःगु महँगी । तर, लिपांगु दिनय् महँगी जक थाहाँ वःगु मखु, थाहाँ वःगु मूल्यस मालसामानया प्याकेटत कयेकुनाः वयाच्वंगु दु । थुकिया सुरुवात नेपाःया दकले अप्वः लोकंह्वाःगु चाउचाउ ब्राण्ड ‘वाइवाइ’पाखें जूगु दु ।
लिपांगु निलाया दुने वाइवाइ चाउचाउ नं निक्वःतक मू थकाःगु दु । वाइवाइ चाउचाउ नं मू जक थकाःगु मखु, चाउचाउया तौल क्वपालाः बजारय् छ्वःगु सीदूगु दु ।
वाइवाइ चाउचाउ नं लिपांगु छुं वाः दुने हे मदिक्क निक्वःतक मू थकाःगु व छक्वः १० ग्राम तौल क्वपाःगु नेपाल खुद्रा व्यापार संघं जानकारी ब्यूगु दु ।
सार्वजनिक रुपं वाइवाइ चाउचाउ नं मू थकाःगु जानकारी ब्यूगु मदुनि । तर, प्याकेटय् मू थाहाँ वइगु व तौल क्वाहाँ वनेगु छक्वलं जुयाः वःगुलिं आपालं ग्राहकपिं अजूचाःगुदु ।
खुद्रा व्यापार संघया छम्ह दुजलं धाःगु दु, ‘बजारय् आपालं चुइगु ७५ ग्रामया वाइवाइ चिकेन व भेज स्वादया चाउचाउया मू जेठ स्वंगूगु वाःतक २० तका खः । आः उगु चाउचाउया मू २३ तका थ्यंगु दुसा तौल गुबलें ६५ ग्रामय् क्वाहाँ वःगु दु । ’ ब्यापारीपिनिगु कथं थ्यंमथ्यं न्याला न्ह्यः ७५ ग्राम तौल क्वपालाः ६५ ग्राम याःगु खः ।
अझ अजूचाइगु खँ छु दु धाःसा वाइवाइ नं प्याकेटय् तौल ६० ग्राम जक तौल क्वःछिनातःगु दु । स्ट्याण्डर्ड नाप व तौल नियमावली २०७६ चाउचाउया प्याकेजिङ ७५ ग्रामं क्वपालेगु खःसा ६० ग्राम कायम यायेमाः । तर, वाइवाइ नं चलाखीपूर्ण ज्या यानाः ५ ग्रामयात ‘फ्रि’ त्याग तःगु दु । अर्थात् आः वाइवाइ नं सितिकं बियावयाच्वंगु ५ ग्राम नं न्ह्याग्गु इलय् नं क्वपालेफु ।
वाइवाइ नं २० जेठलिपा वाइवाइ चिकेन व भेजया मू छसिंकथं ः २० तकां २२ व १५ तका २० तका थ्यंकूगु दु । तर, साउन महिना वयेधुंकाः चिकेन स्वादया मू हाकनं २२ तकां थकयाः २३ तका याःगु खः ।
प्याकेटय् थाहाँ वःगु मूलिसें वाइवाइ नं काटुंनया नं मू थकाःगु दु । खुद्रा व्यापार संघया कथं थ्वसिबें न्ह्यः छगः कार्टुन वाइवाइ चिकेन स्वादया मू ५४० तका खः । आः थ्व चाउचाउया मू प्रति कार्टुनया ५९५ तका थ्यंगु दु ।
वाइवाइ नं चिकेन पिज्जा व क्विक्सयात २० तका व वाइवाइ जम्बोयात २५ तका प्रतिगोटाय् मियाः वयाच्वंगु दु ।
छुं कम्पनीं मू थकाःगु व तौल क्वकाःगु विषयस जानकारी मदइगु वाणिज्य विभागं जानकारी ब्यूगु दु । विभागया महानिर्देशक लिलाप्रसाद शर्माया कथं बिस्कुट उद्योगीं महँगी कथं मू थकाये मदइबलय् तौल क्वकायेगु घुर्की क्यंगु खः । वबाहेक मेमेगु छुं सुचं विभागय् मवःगु शर्मां धाःगु दु ।
मू थकायेगु व तौल क्वकायेगु बारे अनुमति कायेमाःगु व थुकिया बिषयस जानकारी बिइमाःगु व्यवस्था मदुगु खाद्य प्रविधि व गुण नियन्त्रण विभाग, उद्योग विभाग व नेपाल गुणस्तर व नापतौल विभागं जानकारी ब्यूगु दु । प्याकेटय् च्वयातःगु मू व तौल फरक जूगु खनेदत धाःसा कारवाही जुइफूगु विभागीय अधिकारीपिनिगु धापू दु ।
नापतौल विभागया छम्ह अधिकारीं धाःगु दु, ‘वाइवाइ नं हे मू थकयाः तौल क्वकाःगु जुइधुंकाः आः बजारय् थ्व ट्रेन्ड हे न्ह्यानावनी । चुनाव लगेजूगु दु, दलतय्त बिइगु चन्दा जोहो यायेगु अःपुगु लँपु थ्वहे खः ।’
चुं व चिकंया मू सामान्य जुइखतं क्वकाये : चौधरी ग्रुप
चौधरी ग्रुपं धाःसा वाइवाइ मू बृद्धि जूगुलि युक्रेन युद्धया हुनिंछ्वया चुं व नयेगु चिकंया मूल्यबृद्धि कारक जूगु धाःगु दु । लिसें वं तौल क्वाहाँ वःगु व मू थाहाँ वंगु ज्या छक्वलं मजूगु दाबी याःगु दु ।
कम्पनीया न्वकू जिपी शाह नं धाःगु दु, ‘जेठ महिनाय् मूल्यबृद्धि जुइ न्ह्यः हे वाइवाइया तौल ६५ ग्राम खः । आः नं अथेहे दु । उकिं तौल क्वपाःगु धैगु द्वपं पायछि मखु ।’
युक्रेन युद्ध न्ह्यायेधुंकाः छ्वया चुंया मू ३० प्रतिशतं थाहाँ वंगु धासें कम्पनीं हलिंन्यंकं खाद्य चिकं (चाउचाउ उत्पादनय् छ्यलीगु चिकं)या मू ८० प्रतिशतसिबें अप्वलं थाहाँ वंगु व इन्धनया मूल्यस नं ३० प्रतिशतसिबें अप्वलं बृद्धि जूगुलिं लाकूगु दबाब नंलुमंकेत कम्पनीं फुक्कसित इनाप याःगु दु ।
३५ दँ न्ह्यः वाइवाइ मू झितका जूगु धासें वं ३५ दँया दौरानय् लुँ, इन्धन, नेपाली मुद्राया मुद्रास्फीति, केँ जाकि लिसेंया खाद्य हलंज्वलंया मूल्यस ५० औं गुणां थाहाँ वःसां नं वाइवाइया मू धाःसा वहेअनुपातय् थाहाँ मवंगु धाःगु दु ।
हलिंबजारय् आः जूगु अभूतपूर्व मूल्यबृद्धिया हुनिं खाद्य पदार्थ, विशेषयानाः चाउचाउ व बिस्कुया उत्पादन लागतय् आपालं बृद्धि जूगु धासें छ्वया चुं व नयेगु चिकंया मू सामान्य जुइगु खतं चाउचाउया मू समायोजन यायेगु प्रतिबद्धता प्वंकूगु दु ।
Categorized in बजाः