prabhu baink new

वर्ल्ड नेवाः मचा प्रतिभा सिरपा क्वचाल

नेवा: अनलाइन न्युज | २०७७ श्रावण ११, आइतबार ११:३२:१९

वर्ल्ड नेवाः अर्गनाइजेशन या ग्वसालय् जुउगु मचा प्रतिभा कासाय् ताःलापिं मस्तयेगु नांया घोषणा यायेगु ज्या शनिबार बहनी क्वचाल । ग्लोबल नेवाः चिल्ड्रेन्स टेलेण्ट धका ग्वसाः ग्वगु थ्व मचा प्रतिभा मालेगु कासाय् मूक्कं ४९ पीगुंगु ब्वसाः दुथ्यागु खःसा उकी मध्ये खुदँ क्वयेयाःपिंनिगु खगु व खुदँ च्वयेयापिनिगु पीस्वंगु ब्वसाः दुथ्यागु खः ।

छम्ह हे वा छगु हे कासामिं पुचलं छगुसिबें अप्वः ब्वसाः दुथ्याके जिउगु थ्व कासाय् सजगता मानन्धर,सिम्रिक श्रेष्ठ , संकिपा श्रेष्ठ , लुँस्वां मानन्धर व सुविजा मानन्धरपिन्सं छगु सिबें अप्वः ब्वसाः न्ह्यब्वःगु खः ।  युट्युबपाखें जुउगु थ्व कासाया सिरपा घोषणा ज्याझ्वः नेपाःया ई कथं बहनी जःछीपा च्याता ईलय् न्ह्याःगु खः । वर्ल्ड नेवाः अर्गनाइजेशनया नायः सिजन श्रेष्ठया सभानायःसुई न्ह्याःगु ज्याझ्वः जूम नांयागु एपपाखें जुउगु खःसा ग्वसाः खलया फेसबुक पेजपाखें लाइभ प्रसारण जुउगु खः । 

खुदँ च्वयेया स्वम्ह व खुदँ क्वयेया स्वम्ह अले सामाजिक सञ्जाल सिरपा प्यम्हेसित याना मुक्कं झिम्ह मचा तयेसं सिरपा त्याकुगु थ्व कासाय् सामाजिक सञ्जालपाखेया सिरपा घोषणा प्रवीण शाक्यं यानादीगु खःसा थुके न्हाप लाम्ह पल्पसा प्रधानयात न्याद्व तकाया नेवाः नखः न्यूयोर्क सिरपा लाःगु दुसाः लिउ लाःम्ह प्रथम श्रेष्ठयात स्वद्वतकाया न्यू न्युजिलाएण्ड सिरपा , लियांल्यू लाःम्ह नेरिश महर्जनयात निद्व तकाया क्यालिफोर्निया युएस सिरपा व हःपाः आयुष्का जोशीयात द्वछी तकाया लिस्बन पोर्चुगल सिरपा घोषणा यागु खः ।

सामाजिक सञ्जालया वःगु भ्युज व लाइकया आधारय् थ्व  सिरपा क्वछीउगु खःसा प्रतिभाया आधारय् सिरपा क्वछीगु निंतिं नेपालभाषाया न्हापांम्ह सिने पत्रकार कथं नांजाम्ह अले नेवाःअनलाईनन्युजया संरक्षक विजयरत्न असंबरे , नांजाम्ह म्येहालामि सरिष्मा अमात्य व नांजाम्ह चित्रकार व सञ्चारकःमि योंग पिकासोया अजय देसार निर्णायक कथं च्वनादीगु खः । थुके खुदँ सिबें क्वयेयापिं कासामिपिं मध्ये संकिपा श्रेष्ठयात लुमन्ति रेष्टुरेण्ट आयरलाएण्ड सिरपा, आर्जल डंगोलयात  एअर जोन ट्राभेल मेरीलाएण्ड सिरपा , आरिया महर्जनयात एमएम ईण्टरनेशनल ब्रसेल्स सिरपा लाःगु दुसाः खुदँ च्वयेया कासामिपिं मध्ये सजगता मानन्धरयात नेवाः पुचः आयरलाएण्ड सिरपा, सिम्रिक श्रेष्ठयात नेवाः विज्ञान सिरपा व सुबिना,स्वजला,एन्जेला व आर्शमाया पुचःयात  माउण्ट एभरेष्ट रेष्टुराँ मेरिलाएण्ड सिरपा बीगु घोषणा जुल । थ्व खुगुलिं सिरपा म्हतिं न्याद्व न्याद्व तकाया जुइ धाःसा मेपिं काःपिं सकलें मचा प्रतिभा पिन्त हःपाः कथं द्वछि द्वछि तका सिरपा बीगु खँ थ्व मचा प्रतिभा कासाया ग्वसाः कजि दिपेश शाक्यं जानकारी बियादीगु दु । 

 वर्ल्ड नेवाः अर्गनाइजेशनया रश्मिला प्रजापति न्ह्याकादीगु थ्व ज्याझ्वः भर्चुअल रुपय् जुउगु खःसा थ्व सिरपा घोषणा ज्याझ्वलय् किपु महानगरपालिकाया मेयर रमेश महर्जनं मूपाहाँ कथं  ब्वति कयादीगु खः । सांसद राजेन्द्र श्रेष्ठ, नेवाः न्ह्यलुवा मल्ल के सुन्दर , ज्यापु महागुथिया नायः लोककवि राजभाई जकःमि,नेवाः देय् दबुया नायः नरेश ताम्राकार, नांजाम्ह कलाकार नगीना जोशी, वल्र्ड नेवाः अर्गनाइजेशनया संस्थापक दुजः दया शाक्य पिनिसं विशिष्ट पाहाँ कथं ब्वति कयादीगु थ्व  ज्याझ्वलय् ग्वसाः खलःया  कृष्ण चखँ सुभाय् देछानादीगु खः ।

Categorized in नेवाः