zero media family planning adv

वर्ल्ड नेवाः अर्गनाइजेशन नेपाः च्याप्टरया नायः शाक्य सुरेनं राजीनामा लितकाल

नेवा: अनलाइन न्युज – विजयरत्न | २०७७ आषाढ २१, आइतबार १०:०९:५५

वर्ल्ड नेवाः अर्गनाइजेशन नेपाल च्याप्टरया नायःया राजीनामा प्रकरण लितकायेत वर्ल्ड नेवाः अर्गनाइजेशन नेपाल च्याप्टरया नायः शाक्य सुरेनं ब्यूगु राजीनामा च्याप्टरया सचिवालयया बैठकं अस्वीकृत याःगु दु ।

राजीनामा अस्वीकृत यायेधुंकाः नायः शाक्य सुरेनं राजीनामा लितकाःगु खः ।

कोरोना महामारीं मुक्कं हलिं हे आक्रान्त जुयाच्वंगु परिस्थितियात ध्यानय् तयाः संस्थागत हितया नितिं बहुमत दुजःपिन्सं राजीनामा मबिइत मत तयेधुंकाः राजीनामा ब्यूम्ह नायः शाक्य सुरेनं वइगु अधिवेशनतकया नितिं जिम्मेवार बहन यायेत तयार जूगु खः ।

नेपाल च्याप्टरया बुधवाः येँय् आकस्मिक बैठक च्वंगु खः । बैठकय् सल्लाहकारपिं डा. सुमित्रा मानन्धर, पुष्करभक्त माथेमापिनिगु नं उपस्थिति दूगु खः ।

सहलहया झ्वलय् नेपाल च्याप्टरया सचिवालय पदाधिकारीपिं मूछ्याञ्जे रश्मिला प्रजापति, छ्याञ्जे महर्जन रत्न, दांभरी सुरेन्द्रभक्त श्रेष्ठ, ल्यूदांभरी सुदय सिलाकार, दुजःपिं अन्जना ताम्राकार, शान्ति वैद्य, कस्तुरी श्रेष्ठ लिसेंयापिनसं थुगु अवस्थाय् नायःया राजीनामा संस्था हितय् मजुइगु जूगु हुनिं राजीनामा मबिइत व वइगु अधिवेशनतक वहे पदय् च्वनाः ज्या यायेत नायः शाक्य सुरेनयात इनाप याःगु खः ।

छुं दिं न्ह्यः जक नायः शाक्य सुरेनं थःगु स्वास्थ्य समस्याया हुनिं क्यनाः नायः पदं राजीनामा ब्यूगु खःसा सचिवालयया मतयात कदर यासें नायः शाक्य सुरेनं राजीनामा लितकयाः उगु पदय् च्वनाः अधिवेशनतक ज्या यानाः न्हूगु नेतृत्वयात पद हस्तान्तरण यायेत तयार जूगु प्रतिबद्धता प्वंकूगु खःसा थुगु प्रतिबद्धता लिपा उगु च्याप्टरया राजीनामा विवाद क्वचाःगु खः ।

Categorized in नेवाः