nepal life 2076 3 18

वडा अध्यक्ष महर्जनया म्येया म्यूजिक भिडियो प्रिमियर

नेवा: अनलाइन न्युज – विजयरत्न | २०७८ आश्विन ४, सोमबार १७:१६:११

येँ महानगर पालिका १८ वडाया वडा अध्यक्ष न्हुच्छे काजी महर्जनया च्वसां पिज्वःगु निपु म्येया म्यूजिक भिडियोया शनिबार छगू ज्याझ्वःया दथुइ प्रिमियर जूगु दु । 

१८ वडाया सभा हलय् छगू ज्याझ्वःया दथुइ प्रिमियर जूगु निपु म्ये मध्ये छपू खस नेपाली भाषाया ‘किन दुख्न थाल्यो’ बोलया खःसा

मेगु छपू नेपालभाषाया ‘बुदिंया भिन्तुना’ बोलया म्ये खः । म्येच्वमि न्हुच्छे काजी महर्जनया सभापतित्वय् न्ह्याःगु उगु ज्याझ्वलय् येँ महानगर पालिकाया मेयर विद्यासुन्दर शाक्य मूपाहाँ कथं झायादीगु खः ।

मूपाहां शाक्यं प्रिमियर यानादीगु उगु ज्याझ्वलय्  साहित्यकार व समाजसेवी बालकृष्ण सजिव, नांजाःम्ह कलाकार सबिन शाक्य पाहाँ कथं झायादीगु खः । प्रिमियर जूगु ‘किन दुख्न थाल्यो’ म्ये हालादीम्ह राजेन्द्र शाक्य खःसा लय् चिनामि अनिल तुलाधर खः ।

थ्व म्येय् रविना शाक्य, राजेन्द्र कुमार महर्जन ‘राजी किपू’ अले न्हुच्छे काजी महर्जन व राजेन्द्र शाक्यपिन्सं अभिनय यानादीगु दु । 

वरिष्ठ निर्देशक पवन जोशिजु निर्देशन यानादीगु थुगु म्येया किपालुमि व छ्याय्फ्वायकःमि सोहन मानन्धर खः ।

अथेहे बुदिंया भिन्तुना म्येया लय् चिनामि रिता महर्जन खःसा थुकिइ सः बियादीपिं संगिता शाक्य व रिता महर्जन खः । सम्पादन व निर्देशन सुरेन्द्र महर्जनं यानादीगु थुगु म्येया किपालुमि शैलेश श्रेष्ठ लुभु खः ।

थुगु म्येय् म्येच्वमि स्वयं न्हुच्छे काजी महर्जनया नापनापं अनिस महर्जन, रेनुसा महर्जन, अनिना महर्जन, लिजला श्रेयसी, सानुछोरी अले सानुमैयाँपिन्सं अभिनय यानादीगु दु ।

वडा सदस्य शोभा महर्जनं न्ह्याकादीगु थुगु प्रिमियर ज्याझ्वलय् म्यूजिक भिडियोया निर्देशकपिं पवन जोशी व सुरेन्द्र महर्जनं थः थःगु नुगः खँ तयादिल ।

नुगः खँ तयेगु झ्वलय् पाहाँ बालकृष्ण सजिवं थुगु वडाय् तसकं नांजाःपिं कलाकारपिं दुगु महत्वपूर्णगु वडा खः धासें प्रिमियर जूगु म्येयात भिन्तुना नं वियादीगु दु ।

अथेहे मूपाहाँ मेयर भाजु शाक्यं थः मचाबलय् मचाः पुचः निस्वनाः कलाकार क्षेत्रय् यक्वः ग्वाहाली यानागु लुमंकुसे म्येच्वमि महर्जनया पलाः सदां बांबांलाःगु ज्याय् न्ह्याना च्वनेमा धकाः भिंतुना नं बियादिल ।

Categorized in कला