२०७२ भाद्र १६, बुधबार १३:३९:५०

न्ह्याबलें ल्याय्म्ह खने दयाच्वनेगु इच्छा सुयात जक मदइ ? तर ल्याय्म्हसू धयागु खँ दँ वंलिसे सुकू गना वनी । हलिमय् मनूतय्सं ल्याय्म्ह खनेदयेकेगु निंतिं क्रिम पाउडरनिसें कया: फेरियलयालिसं सर्जरीतकं याकेगु यानाच्वनी । तर विज्ञपिनिकथं थुज्व:गु कृत्रिम उपायं दीर्घकालीन रुपय् छुं लिच्व: लाके फइगु व उकिया लिच्व: केवल अल्पकालिन जक जुइ ।

वास्तवय् दँ वंलिसे ज्याथं थिया हइगु प्राकृतिक नियम हे ख: । तर गुलिं गुलिं मनूत ल्याय्म्ह इलय् हे ज्याथ: थें खनेदइ । बेलायतया शोधकर्ता डा. डेभिड विक्सं मनूतय्के याकनं वइगु ज्याथसूयात गुकथं पने फइ व ल्याय्म्हसूयात गुकथं ता:ईतक ल्यंका तयेफइ धैगु विषयस अनुसन्धान यानाच्वंगु दु । वय्क:या कथं मिसा व मिजनय् ल्याय्म्हसूयात ता:हाकयेकेगु छगू महत्वपूर्ण उपाय नियमित सम्भोग ख: । नियमित सम्भोगं ल्याय्म्ह ई पुलेधुंकूपिं मिसा व मिजं निम्हं न्यादँनिसें न्हय्दँतक म्हो दँया खनेदइगु वय्क:या धापू दु । वय्क:या कथं सहवासया झ्वलय् म्हं पिहां वइगु हर्मोनं ज्याथसूयात म्हो यायेत ग्वाहालि याइ ।

डा. डेभिडं थ्व शोधया झ्वलय् झिदँतक थीथी दँ पुच:या द्वलंद्व: मिसा व मिजंतय् दथुइ अध्ययन यात । थ्व झ्वलय् वय्कलं ४०–५० दँ पुच:या मिसामिजंत यक्व: ल्याय्म्ह जूगु खन । वय्क:या कथं ल्याय्म्ह खनेदुपिं  ४०–५० दँयापिं मनूतय्सं वालय् म्होतिं नं स्वक्व:तक शारीरिक स्वापू तयेगु या: । डेभिडं धाइ, यौन सम्बन्धं वइगु आनन्द ल्याय्म्हसू ल्यंका तयेगु मू अस्त्र ख: । 

वय्क:या कथं सम्भोगया झ्वलय् वइगु भावनाया आवेगं मनूया स्वास्थ्य गथे च्वं धइगु खँतकं सीके फइ । सम्भोगया झ्वलय् भावनाया आवेग अप्वया वइपिं मनूतय्गु हृदयाघातलिसेंया समस्यां अकालय् ज्यान वनीगु सम्भावना ५० प्रतिशतं म्हो जुइगु थ्वयां न्ह्य: भारतय् या:गु अध्ययनं नं क्यनेधुंकूगु दु । नियमित सम्भोग याइपिं मनूत थीथी कथंया स्वास्थ्य समस्यां पीडित जुइगु सम्भावना म्हो जक सहबासय् ब्वति काइपिं मनूत स्वयां यक्व म्हो जुइ ।