zero media family planning adv

लोकल अयलाःयात ब्रान्डिंग यायेगु मन्त्रीया योजना

नेवा: अनलाइन न्युज – ललेन्द्र शाक्य | २०७७ चैत्र १९, बिहिबार ११:३१:३५

विदेशी अयलाखय् न्ह्याइपुकी, थुकिं देसयात फाइदा याइमखु । आः लोकल अयलाःयात ब्रान्डिंग यानाः नागरिकया आर्थिक अवस्था सुधार यायेमाः । व्यवस्थित रुपं उत्पादन यानाः विश्व बजारय् थ्यंकेगु आज्जुया लिसें सरकारं ज्या याइ

 

व्यवस्थित रुपं उत्पादन यानाः विश्व बजारय् थ्यंकेगु आज्जुया लिसें सरकारं ज्या याइ

प्रदेश १ या न्हूम्ह नियुक्त सामाजिक विकासमन्त्री उषाकला राई नं दुसिया अयलाः (कोदोया अयलाः)यात ब्रान्डिंग यायेगु योजना न्ह्यःने हःगु दु । शुक्रवाः मन्त्रीया कार्यभार कःघाःम्ह मन्त्री राई नं दुसिया अयलाःयात बायन्ड मखुसे ब्रान्डिंग यायेगु धाःगु खः ।

कानूनी रुपं लोकल अयलाः मिइगुलि प्रतिबन्ध तयातःगु दु । दुसिया अयलाःयात ब्रान्डिंग यानाः बिइतः कानूनी व ब्यावहारिक पक्षया अध्ययन न्ह्याकागु मन्त्री राई नं धाःगु दु । कानूनी व ब्यावहारिक पक्षया अध्ययन यानाः स्थानीयबासीया जीवनस्तर थकायेगु नितिं दुसिपाखें दयेकीगु अयलाःयात ब्रान्डिंग यायेगु मन्त्री राई नं धाःगु दु ।

मन्त्री राई नं धाःगु दु, गांगामय् अयलाः दयेकेगु व मिइगु न्हूगु खँ मखु । कानूनी समाधान मालेगु जुइ । बायण्ड भर्सेज ब्राण्डया अवधारणा न्ह्यःने यंकेगु जुइ ।

विदेशं थिकेगु अयलाः आयात यायेबलय् देसया तःधंगु पूँजी पिहाँ वनाच्वंगु धासें मन्त्री उषाकला राई नं दुसिया उत्पादनयात ब्रान्डिंग यायेफत धाःसा निर्यातया नं सम्भावना दूगु धाःगु दु ।

मन्त्री राई नं धाःगु दु, विदेशी अयलाखय् न्ह्याइपुकी, थुकिं देसयात फाइदा याइमखु । आः लोकल अयलाःयात ब्रान्डिंग यानाः नागरिकया आर्थिक अवस्था सुधार यायेमाः ।

व्यवस्थित रुपं उत्पादन यानाः विश्व बजारय् थ्यंकेगु आज्जुया लिसें सरकारं ज्या याइगु मन्त्री राई नं धाःगु दु ।

Categorized in बजाः