nepal investment baink

लोकं ह्वानाच्वन नील शाक्यया संगीतय् रानी शाक्य व कुमार शानुया हिन्दी ज्वःम्ये

नेवा: अनलाइन न्युज – विजयरत्न | नेपाल संवत ११४४ तछलागा अमाई (२०८१ असार २१ गते) शुक्रवाः

नेपालभाषाया न्हापांगु म्युजिक भिडियो ‘लुमंका च्वना छन्त जिं ’ या गायक अले सपना श्री मयजुं हालादीगु लोकं ह्वाःगु म्ये ‘स्वयेगु मन जुल रे’ या म्येच्वमि लिसें देविका प्रधान व राजेश महर्जनया सलं थ्वःगु लोकंह्वाःगु नेपालभाषाया म्ये ‘जिगु बैशं धाल’ म्येया लय् चिनामि नील शाक्ययात नेपालभाषाया सांगितिक क्षेत्रय् सदाबहार सांगितिक व्यक्तित्वया रुप कयातःगु दु ।  

वयकलं हालादीगु , च्वयादीगु व संगीत सृजना यानादीगु म्ये सदां लोकं ह्वानाच्वंगु दु ।

थथे सदाबहार संगीतकःमि कथं न्ह्यने लानाच्वंम्ह  नील शाक्यया संगीत सृजनाय् ‘शिद्दत’ नांयागु छपू हिन्दी ज्वःम्ये छुं न्हि न्ह्यः जक पिहाँ वःगु दु ।

भारतया नांजाःम्ह गायक कुमार शानु व नेपाःया गायिका रानी शाक्यया ज्वःम्ये कथं वंगु जुन महिनाया ३० तारीखया दिं गायिका रानी शाक्यया थःगु हे नांया युट्युब च्यानलपाखें सार्वजनिक याःगु खः । थ्व प्यन्हु न्यान्हुया दुने थ्यंमथ्यं न्हयगू लखया ल्याखँ स्वकुमिपिन्सं स्वयेधुंकुगु दु ।

थथे म्हो ईया दुने हे थुलिमछि भ्युज मुनेत ताःलाःगु थ्व म्युजिक भिडियो दुने अभिषेक खड्का व कुसुम शर्मां अभिनय यानातःगु दु । थ्व भिडियोया निर्देशक एवं कोरियोग्राफर रामजी लामिछाने अले सिनेमाटोग्राफर मानकृष्ण महर्जन व सम्पादन बन्दे प्रसाद भाजुं यानातःगु खः ।

थ्व म्येया रेकर्डिंग मुम्बईया पन्चमी स्टुडियोस जूगु खःसा रेकर्डिस्ट फिरोज बज्राचार्य खः ।

थ्व म्येया म्येच्वमि निशिला शाक्य खः । निशिला शाक्य धइम्ह संगीतकःमि नील शाक्यया म्ह्याय् खःसा वयक मयजु छम्ह बांलाःम्ह कोरियोग्राफर नं खः । थुकिया संगीत संयोजक नेपाःया नांजाःम्ह संगीतकःमि जिवित जल्मी खः ।

थ्व म्येयात बलिउडया नांजाःम्ह गायक कुमार शानु भाजुं थःम्हेसिनं हालागु आःतकया बांलाःगु म्ये खः धका धाःगु दु । वयकलं थ्व म्येया भिडियोया प्रचारया लागिं मुम्बई नं  छ्वयाहःगु छगू सन्देशय् थ्व म्येया गीतकार, सगीतकार लगायत गायिकायात च्वछासे म्ये व भिडियो बांलागुलिं लसता प्वंकुगु दु ।

Categorized in कला