स्वनिगलय् सवारी चाप नापं पार्किङ स्थलया अभाव जुयाःवयेवं  येँ महानगरपालिकां भूमिगत पार्किङया अवधारणा हल । येँनपां  खुलामञ्च व लैनचौरय् भूमिगत पार्किङ निर्माण यायेगु प्रस्ताव तयार यानाः संघीय मामिला व स्थानीय विकास लःल्हागु लच्छि दये धुकाः नं मन्त्रालयलय् नं गुगु नं कथंया प्रतिक्रिया ब्यूगु मदुनि ।
महानगरया सार्वजनिक–निजी साझेदारी महाशाखा प्रमुख शिवराज अधिकारीया कथं  मन्त्रालय नं प्रस्ताव यात कयाः छलफल मजुनिगु लिसः ब्यूगु दु ।  मन्त्रालयया प्रवक्ता पूर्णचन्द्र भट्टराई नं धाःसा भूमिगत पार्किङ निर्माणया विषय येँ नपाय् दुने  छलफलया झ्वलय् दुगुलिं निर्माण सुरु जुइत छु ई काइगु व अध्ययन अझ ल्यंदनिगु धासें येँनपा यात मन्त्रालय नं ग्वहालि याइगु प्रतिबद्धता प्वंकुगु दु ।

गुज्वःगु जुइ भूमिगगत पार्किङ

न्युरोड, ठमेल, दरबारमार्ग, भोताहितिलिसेंया व्यस्त थाय्या पार्किङ व्यवस्थापनया नितिं मगानगरं भूमितग पार्किङया अवधारणा हःगु दु । लैनचौर व तिंख्यलय् बजार, कफिसप व पसःलिसेंया बेसमेन्ट पार्किङ दयेकेगु तयारी महानगरं याःगु दु ।
जग्गाया अनुमति व लगानीया मोडल मन्त्रालयपाखें वयेधुंकाः निर्माण ज्या न्ह्यःने यंकूगु महानगरं जानकारी ब्यूगु दु ।
निजी कम्पनीयात निर्माणया जिम्म बियाः २५ दँतक संचालन यानाः महानगरयात हे हस्तान्तरण यायेगु महानगरया प्रस्ताव खः । पार्किङ निर्माणया नितिं ३ निसें ५ दँया ई तुइ । पार्किङ व व्यापारिक स्टलतपाखें वइगु रकम २५ दँतक निर्माण याइगु कम्पनीं हे कायेखनी । तिंख्यःया पार्किङय् ३ तलाया पार्किङ दयेकीगु जुइ । न्हापांगु तलाय् कफी पस लिसें थीथी व्यापारिक स्टलनापंया कम्लेक्स दयेकाः मोटरसाइकल पार्किङलिसें थीथी व्यापारिक स्टलत तइगु योजना दु ।
पार्किङपाखें जक हे लगानी उठे मजुइगु जुइधुंकाः छगू तलाय् व्यावसायिक स्टल तयेत प्रस्ताव आह्वान याइगु जूगु दु ।
निगूगु व स्वंगूगु तलाय् पूर्ण रुपं पार्किङया व्यवस्था मिले याइगु जुइ । पैदलयात्री व पार्किङ यानाः पिहां वयेगु नितिं प्यंगू अण्डरग्राउण्ड सबवेया निर्माण याइगु जुइ । तिंख्यलय् निर्माण पार्किङ स्थाल वीर अस्पाल, भोताहिति, पुलांगु बसपार्क व बागबजारःया लँपुलिसे स्वाइ ।
तिंख्यःया पिनेया संरचना हिलाबुला मयाःसें हे पार्किङ दयेकेगु महानगरया योजना दु । तर, सवारीसाधन धाःसा वीर अस्पतालया लँपु जुयाः दुहाँ वयेमालीसा पुलांगु बसपार्कपाखें पिहां वनीगु लँपु तइगु जूगु दु ।

पार्किङया दुनेतक निभाःया जः दुहां वइगु यायेत व फय्या प्रवाह कायम योत दथुइ छुं संरचनात तइगु जुइ । तिंख्यःया भूमिगत पार्किङ अत्याधुनिक व व्यवस्थित जुइ ।  ४८ रोपनी जग्गया् निर्माण जुइगु तिंख्यःया भूमिगत पार्किङ निर्माणया नितिं ३ अर्ब तका दां तुइगु अनुमान महानगरया दु ।
फुक्क कथंया सवारी पार्किङया सुविधा मिले याइगु  थुगु पार्किङ स्थलय् छक्लं १००० सिबें अप्वः सवारी पार्किङ यायेफइगु जुइ । लैनचौरया पार्किङय् नं स्वंगू तलाया अन्डरग्राउण्ड पार्किङ निर्माणया  प्रस्ताव याःगु दु ।
लैनचौरय् पाकिङ निर्माण याइबलय् सडकपाखें थ्यंमथ्यं ५ फिट तःजाःगु दयेकीगु जुइ । तिंख्यलय् थेंहे थन नं न्हापांगु तलाय् व्यावसायिक बजार तइगु  जुइसा छुं भाग मोटरसाइकल पार्किङया नितिं छुटे याइ । लैनचौरय् सोह्रखुट्टेपाखें वइगु सवारीसाधनयात तप्यंक पार्किङ स्थलतक वनीगु सुविधा मिले याइगु जुइ ।
जमलपाखें वइगु सवारीसाधनया नितिं धाःसा समाज कल्याण परिषदया जग्गा भाडाय् कयाः ब्यागलं लँपु दयेकेगु प्रस्ताव याःगु दु । न्यासि वनीपिं यात्रुपिन्त न्यासि वनेत व पिहां वनेत अमृत साइन्स क्याम्पसपाखें २२५ मिटरया अन्डरग्राउण्ड सबवे तइगु जुइ ।
लैनचौरय् भूमिगत पार्किङ दयेकेत ७५ करोड तका दां तुइगु अनुमान याःगु दु । थनया पार्किङय् छक्वलं ३०० कार न्ह्यनी ।
 – १२ खरी अनलाइन पाखें साभार