Header Nepal rastra bank Adv

लुम्विनीइ स्वक्वःगु संघ प्रवेश ज्याझ्वः व निक्वःगु प्रवज्या सम्वर

नेवा: अनलाइन न्युज – ललेन्द्र शाक्य | २०७८ फाल्गुण २९, आइतबार १३:४७:१७

वंगु बिहिवाः नेपाल बज्रयान महाविहार लुम्विनीइ निक्वःगु प्रवज्या सम्वर  व स्वक्वःगुु संघ प्रवेश ज्याझ्वः जूगु दु । उगु ज्याझ्वलय् १६ म्ह मिसापिन्त प्रवज्या सम्वर याःगु खःसा ८ म्ह मिजंपिन्त स्वक्वःगु संघ प्रवेश याकूगु खः ।

थुकथंया ज्याझ्वः न्ह्याकेत बुधवाः लुम्विनीइ ग्वयदां तयेगु ज्या व अधिवासन (दुसो) यायेगु ज्या जूगु खः । थुकथं प्रवज्या सम्वरया ज्याझ्वःया झ्वलय् गुरुमांजुपाखें मिसापिन्त सँ चाका बिज्याःगु खःसा महाविहारया चक्रेश्वर प्रा.डा. नरेशमान बज्राचार्यजुपाखें बज्रयानी पुजाविधिकथं प्रवज्या सम्वरया थीथी ज्याझ्वः याना बिज्याःगु खः । वसपोलं न्हूपिं गुरुमांजुपिनिगु नां तकं छुना बिज्याःगु खः ।  

प्रवज्या सम्वर याना बिज्याःपिं गुरुमांजुपिं सरला बज्राचार्य, उर्मिला ताम्राकार लगायतपिन्सं नं थःथःगु् नुगः खँ तयाबिज्यागु खः । उगु ज्याझ्वलय् न्हूपिं संघ प्रवेश जुया बिज्याःपिं संघयात नं सुचारु रुपं न्ह्याकेया नितिं चन्दा नं बिया बिज्याःगु खः ।

संघ प्रवेश जुया बिज्याःपिं तीर्थराज शाक्य, प्रविण बज्राचार्यजुपिन्सं नं संघ प्रवेशयात कःघाना थःगु अनुभवया खँ तयाबिज्याःगु खः । उगु ज्याझ्वः राज गुरुजु मञ्जुश्री रत्न बज्राचार्यजुं न्ह्याका बिज्याःगु खः ।

थुकथं हे शुक्रवाः भैरहवाया पुष्प कीर्ति बुद्ध विहार व लुम्विनी बौद्ध विश्वविद्यालयस  भिक्षाघाटन यायेगु ज्या नं जूगु खः । भैरहवाय् कविन्द्रमुनि बज्राचार्य, भैरहवाया शरण, व प्रा.डा. नरेशमान बज्राचार्यपाखें पुष्प कीर्ति बुद्ध विहारया विषययात कःघाना थःगु खँ तयाबिज्याःगु खः । थुुगु पुष्प कीर्ति बुद्ध विहार नेपाल बज्रयान महाविहारयात लःल्हाना तयेधुंकूगु दु । आः थुगु् विहार नेवाः शैलीं दयेकीगु नं  जूगु दु ।

थुकथं हे लुम्विनी विश्व विद्यालयया उपकुलपति हृदयरत्न बज्राचार्यजु व प्रा.डा. नरेशमान बज्राचार्यजुपाखें नं बुद्धधर्मया दर्शण पक्षया लिसें विश्वविद्यालयया बारे खँ कना बिज्याःगु खः ।

सम्यक वाःपौपाखें

Categorized in पत्रपत्रिका