nepal investment baink

लुम्बिनीइ फागुन २० गतेनिसें २२ गतेतक त्रिपिटक वाचन

नेवा: अनलाइन न्युज – ललेन्द्र शाक्य | ने.सं. ११४४ सिल्लागा दुतिया

अखिल नेपाल भिक्षु महासंघया ग्वसालय् स्वक्वःगु लुम्बिनी अन्तर्राष्ट्रिय त्रिपिटक पाठ समारोह २०८० थ्वहे वइगु फागुन २० गते आइतवाःनिसें २२ गते मंगलवाःतक लुम्बिनीइ जुइगु जूगु दु ।

थुकिया जानकारी आइतवाः समारोह समितिं ग्वसाः ग्वःगु पत्रकार सम्मेलनय् ब्यूगु खः ।

पत्रकार सम्मेलनय् पितब्यूगु प्रेस विज्ञप्तिइ बुद्ध जन्मभूमि लुम्बिनीयात संसारय् म्हसीका बिइगु नितिं, बहुजन हित, बहुजन सुख व सत्व प्राणी कल्याणया लिसें हलिंन्यंकं शान्तिया सन्देश बिइत थथे लुम्बिनीइ पवित्र त्रिपिटक पाठ ग्वसाः ग्वयागु खँ न्ह्यथनातःगु दु ।

समारोह समितिया प्रचार व संचार संयोजक भिक्षु विमलो महास्थविरया ल्हाःचिं तयाः पितब्यूगु उगु विज्ञप्तिइ त्रिपिटक, सूत्रपिटक, विनयपिटक, अभिधम्म पिटकया छगू हे थासय् माःहनाः त्रिपिटक जूगु व ८४ हजार धर्मस्कण्ड समावेश जूगु खँ न्ह्यथनातःगु दु ।

लिसें विज्ञप्तिइ थथे भव्य व सभ्य कथं अन्तर्राष्ट्रिय त्रिपिटक पाठया धार्मिक ज्याझ्वः ताःलाकेगु नितिं थःथःगु थासं मैत्रीपूर्ण सहभागिता व पुण्य संचय यानादीत अखिल नेपाल भिक्षु महासंघं सकलसित इनाप यानातःगु खँ न्ह्यथनातःगु दु ।

Categorized in राष्ट्रिय