नेवा: अनलाइन न्युज | २०८० भाद्र २९, शुक्रबार १५:०५:४९

प्रधानमन्त्री पुष्पकमल दाहाल प्रचण्डं वंगु साउन ३ गते येँया सिनामंगलं बरामद जूगु ६० किलो लुँ प्रकरणय् छानविन यायेत उच्चस्तरीय छानविन आयोग दयेकेगु प्रक्रिया न्ह्यायेधुंकूगु धाःगु दु ।

शुक्रवाः प्रतिनिधिसभा बैठकय् चीन भ्रमणबारे जानकारी बिइगु झ्वलय् प्रधानमन्त्री प्रचण्डं धाःगु दु, ‘लुँ तस्करी प्रकरणया अनुसन्धान क्वचायेकाः सीआईबीं प्रतिवेदन लःल्हायेधुंकूगु दु । उच्चस्तरीय छानविन आयोग दयेकेगु प्रक्रिया न्ह्यःने वनेधुंकूगु दु ।’

प्रधानमन्त्री प्रचण्डं कांग्रेस सहमहामन्त्री महेन्द्र यादवयात आक्रमण याःम्ह व्यक्तियात कारवाही यायेगु नं धाःगु दु । शान्ति सुरक्षा प्रदान यायेत सरकार प्रतिबद्ध जूगु प्रचण्डया धापू दु ।

चीन भ्रमणया झ्वलय् कृषि, ऊर्जा, पर्यटन, स्वास्थ्य, शिक्षा क्षेत्रय् ग्वाहालि यायेगु विषयस सहलह जुइगु प्रधानमन्त्री प्रचण्डं धाःगु दु । कोभिडया हुनिं बन्द जूगु नाका चायेकेत खँ ल्हायेगु योजना दूगु प्रधानमन्त्री प्रचण्डं सदनयात जानकारी ब्यूगु दु ।

उगु प्रकरणयात कयाः एमालें सदनय् लच्छितक अवरोध याःगु खः । एमालेया अवरोधलिपा सरकारं असोज ५ गते दुने छानविन समिति दयेकेगु प्रतिबद्धता प्वंकूगु दु ।

Categorized in राजनीति