nepal investment baink

लुँ तस्करीइ लाःम्ह प्लाटिनम कलेज संचालक गुरुङ गिरफ्तार

नेवा: अनलाइन न्युज – ललेन्द्र शाक्य | ने.सं. ११४४ सिल्लागा दुतिया

प्रहरीं लुँ तस्करी प्रकरणय् स्वाःम्ह प्लाटिनम कलेजया संचालक जीवनकुमार गुरुङयात गिरफ्तार याःगु दु ।

केन्द्रीय अनुसन्धान ब्युरो (सीआईबी)या पुचलं गुरुङयात येँया सामाखुशीपाखें गिरफ्तार याःगु प्रहरी उच्च स्रोतं जानकारी ब्यूगु दु ।

मंसीर २१ गते फ्लाई दुबईपाखें वःम्ह चन्द्र घलेया पाखें १४ किलो लुँ बरामद जूगु खः । उगु प्रकरणय् अनुसन्धानलिपा जिल्ला अदालत येँय् दायर मुद्दाय् वयात प्रतिवादी दयेकूगु खः ।

ब्युरोया छम्ह अधिकृतं गुरुङयात विमानस्थल भन्सार ज्याकुथिइ बुझेयायेगु तयारी याःगु धाःगु दु । थ्व गिरोहं हःगु लुँ अध्यागमन क्षेत्रय् दूगु चःबिइ सुचुकाः कर्मचारीया हे मिलेमतोय् पितहयेगु याःगु अनुसन्धानपाखें सीदूगु खः ।

प्रहरी अनुसन्धानया झ्वलय् दुबईस च्वनाच्वंम्ह अंकित अग्रवाल व गुरु धाइम्ह भारतीय नागरिकं १३८ किलो लुँ तस्करी यायेधुंकूगु खुलस्त जूगु खः । इमिगु स्वापू प्लाटिनम कलेजया संचालक जीवनकुमार गुरुङलिसे खनेदूगु अधिकृतपिनिगु धापू दु ।

गुरुङपाखें तस्करीइ दुथ्याःम्ह मू नाइकेपिंतक थ्यनेत सहज जुइगु अधिकृतपिन्सं धाःगु दु । वया माओवादी नेतापिंलिसे नं लिक्कया स्वापू दूगु अधिकृतपिन्सं धाःगु दु ।

थुकथं ज्वंगु खँ लुँ

तत्कालीन विमानस्थल भन्सार ज्याकुथिया प्रमुख टोकराज पाण्डें विशेष सुचंया आधारय् मंसीर २१ गते चान्हय् ११ः४० ता इलय् फ्लाई दुबईया विमानपाखें चन्द्र घलेयात नियनत्रणय् काःगु खः ।

विमानस्थल दुहाँ वयेखतं लुँ व्यवस्थापन जुइगु सुचं वयेधुंकाः विमानपाखें नियन्त्रणय् कयाः जाँच याःबलय् वया म्हगलय् लुँया ७ गू विस्कुट लुयावःगु खः ।

वहे झ्वलय् घलें थःगु ज्या लुँ ज्वनाः वयाः अध्यागमनय् दुम्ह सीआईपी कक्षया चःबिइ तयेगु जक जूगु धाःगु खः ।

गिरफ्तारीइ लायेधुंकाः भन्सारया अधिकारीपिन्त बयान बिसें वं गोरखाया मीनबहादुर घलें थःत युएई छ्वःगु सीदूगु खः ।

वपाखें मीनबहादुरया डेराबारे जानकारी कायेधुंकाः प्रहरीया ग्वाहालि कयाः भन्सारया पुचः चान्हय् हे धुम्बाराहीइ च्वंगु मीनबहादुर च्वनाच्वंगु छेँय् थ्यंकूगु खः ।

थ्यंमथ्यं ३ ता इलय् छेँपाखें व गिरफ्तारीइ लाःगु खः । वहे झ्वलय् वं भारतीय नागरिक अंकित व गुरुया संलग्नता सीदूगु खः ।

थ्व मामलाय् लिपा विमानस्थलया सरसफाई सुपरभाइजर सुशीला पाण्डे, सरसफाई कर्मचारी कपिल ओझा, गणेश चेपाङ, विमानस्थल नागरिक उड्डयन ज्याकुथिया ग्वाहालिमि लेखबहादुर तामाङ, अनिल श्रेष्ठ गिरफ्तारीइ लाःगु खः ।

एयर साइड अफिसय् ज्या यानाच्वंपिं रमेश देउला, प्लम्बर शेरबहादुर बस्नेत व एसी प्राविधिक राधाकृष्ण श्रेष्ठया नं संलग्नता सीदयेधुंकाः इमित ज्वंगु खः ।

Categorized in दुर्घटना-अपराध