zero media family planning adv

लिभिंग टुगेडर ( हरिकृष्ण डगोलया साहित्यिक च्वसु )


लुखाय् नक याःगु सःलं जिगु न्ह्यः चबुत । लुखा चायेका स्वयाः । रमेश जुयाच्वन । जिं वयात दुहाँ वा धयाः । व दुहाँ वयाखतं सोफाय् फयतुत ।
– ‘वनेगु ई ला मजूनि थें च्वँ ।’ जिगु म्हुतुं अनायस हे सः पिज्वल ।
वास्तवय् जिगु कोथाय् वा अपार्टमेण्टय् वयेत वयात आज्ञा बीमाःगु आवश्यता मदु । व न्ह्यागु इलय् नं वयेफु, वया च्वंगु नं दु । अले जि नं वयागु अपार्टमेण्टय् छुं नं इलय् वनाच्वनागु दु । खः नक मयायेकं वा लुखाय् सः मबीकं गुबलें नं जिपिं मेम्हेसिगु अपार्टमेण्टय् दुहाँ मवनाः । पर्मिसन बिना दुहाँ मवनेगु थ्व थनया सभ्यता खः । जिम्हिसं थ्व पालना यानाच्वना ।
– ‘वनेगु ला बागु घण्टा न्ह्यः जक खः । करिब न्यागु घण्टा बांकी दनि । तर ... ।’ वाक्य पुमवंकुसें वं जितः स्वल ।
जिं वयात स्वयाः न्यनाः – ‘छाये छु जुल ?’
– ‘अँ ... छँ थौं अफिस बिदा दु । जिं नं वयात काः वनेमाःगुलिं बिदा काये धुन । उकिं थ्व दथुया ई छु याना छ्याये धइगु जूगुलिं जि थन वयागु ।’ रमेशं थुलि हे जक धाल ।
तर जिं स्यू वयाः मनय् धौबजी वालाच्वंगु दु । वं मनय् खँ यक्वः ब्याकाच्वंगु दु । नत्र वः जिगु अपार्टमेण्टय् थुलि याकनं दुहाँ वइ मखु ।
अफिस बिदा जिमिगु लागि तसकं महत्वपूर्ण ई खः । थयागु इलय् हे जिपिं मन फुक्का याना द्यनेगु खः । मेबेलय् जिपिं द्यने धाःसां द्यने खनी मखु । कलेज व ज्यां हे जिमिगु ई नयाच्वनी । जिपिं द्यनेगु धइगु हे चार, पाँच घण्टा जक खः । थथे बिदा वल कि जिमिगु ई अप्वः याना द्यनेगुली हे फुनाच्वनी । उकिं बिदा दुःसां जिमिसं म्वाय्कं म्वाय्कं सुयातं नापलायेगु मयाना । नापलाय् मखु । खः छुं विशेष ज्या, गनं वनेगु प्रोग्राम वा छुं अयागु हे महत्वपूर्ण ज्या खँ जुल धाःसा जक जिमिसं छम्हेस्यां मेम्हेसित नाप लायेगु याना ।
– ‘जि हे जिल नि । जि नं छघौ द्यने हे हुन । बरु छु त्वनेगु ?’ जिं वयाके न्यनाः ।
– ‘छुं नं मयः । फ्यतु ।’
जि वया नापसं फ्यतुना ।
वं ताउत छुं मधाः । बस् उखेथुखे स्वया च्वन । थथे व गुबलें सुम्क च्वंगु जिं मखं । जितः नापलात कि वं छुं नं छुं खँ ल्हाना जितः न्हिकेत स्वया च्वनी । उकिं कोथाया थ्व शुन्यता जितः भचा गरखेसे च्वना वल । जिं हे खँ ल्ह्वना ।
– ‘प्लेन लाण्डिंग गुलि बजे जुइगु ?’
– ‘सनिलया ५ बजे धाःगु ।’
जिं घडी स्वयाः । न्हिनसिया १२ बजे जुइन । जिपिं च्वच्वनागु कसले एभेन्यू आर्लिंगटनं फोर्टवर्थडाल्लास इन्टरनेशनल एयरपोर्ट थ्यंकेत बाघौ माः । करिब साढे चार घण्टा बांकी दनी ।
– ‘थन वइम्ह व मिसा छिमि सु धइगु ?’ जिं वयाके न्यना । खय्त ला रमेशं उकुन्हु हे व मिसाया वारे छुं खँ कने धुंकूगु खः ।
– ‘खास सुं नं परे मजू । वं न ब्वनेगु लागि टेक्सास वेल्सियन युनिभर्सिटी आवेदन ब्यूगु खनि । वयागु आवेदन स्वीकृति जुयाः ब्वं वयेत भिसा न बिल खनि । थन वयेत समस्या जुइगु खँ कंबलय् जि ब्वनागु व ज्या यानागु टेक्सास वेल्सियन युनिभर्सिटीं वयात जितः सम्पर्क ति धाल थें अले वं जि लिसे सम्पर्क याःगु खः ।’
– ‘अले छम्ह म्हमस्यूम्ह मिजंलिसे नं व मिसा च्वं वय् धाल ला ?’
– ‘जिं नं वयात अथे हे धयागु खः । जि थन याकचा च्वच्वनागु दु । छकू जक बेडरुम दु धयागु ।’
– ‘अले ... ।’
– ‘वया थन म्हस्यूपिं सुं मदु हँ । ओरियन्टल क्लास जुई निन्हु न्ह्यः हे वः थन थ्यनिगु जुल हँ । गनं च्वने थाय् मदु । सुं म्हस्यूपिं मदु धाल । जितः छु धाये छु धाये जुल । होटेलय् च्वनेगु खःसा बन्दोबस्त याना बी नं धयाः । तर वं थन छुं मस्यू, हानं कंस कुन्ुहु याकनं हे ओरियन्टल क्लासय् थ्यंके मानी । छिं हे तया बी मानि धाल । अथेखःसा लिभिंग रुम थें ज्यागु छकू कोथा दु । अन सोफाय् द्यनेगु खःसा ज्यू धयाः । वं नं छितः मछिं मजूसाः निन्हु न्हयाथे यानासां च्वने धाल । ज्यू धाम्ह्ेसित थयागु परदेशय् गथे याना होटलय् तये यंकेगु । हानं व ला थन ब्वं वम्ह । होटेलया खर्च छं नं सि हे स्यू । हानं झी हे नेवाः मचा लाना च्वन । अथे जूगुलिं वयात हे मछिं मजूसाः जितः जक छाये धइथें जुल । वा धयाः ।’
रमेशया खँँ न्यनाः जितः भचा मछिंथें जुयाः वल । जिगु नुगः तिंक मिन । जिं रमेशया ख्वाः स्वयाः । जिं स्यू रमेश अयाम्ह मनू मखु । रमेशया मनय् पाप मदु । वं थःम्ह फतले सकसितं ग्वाहालि यानाच्वंगु दु । जितः नं ला वं हे ग्वाहालि याःगु खः । वं हे ग्वाहालि यानाः जि थनया अपार्टमेण्टय् च्वं वय् फूगु खः । नत्र सा जि आःतक नं वहे मिसा पासापिं नापं च्वच्वने मालिगु जुइ । गुपिं ब्वनेगु नामय् थन स्वच्छन्द जीवन हनाच्वंगु दु । चुरोट, बिय्र, ह्विस्की, ब्वाईफ्रेण्ड आदि आदि खँय् मनमोज यानाच्वंगु दु । इपिं नाप जि गनं वने ममदु । तर नं इमिसं करकर याई । अले जि वनेगु । मयः मयः इमिगु चुरोटया कुँ घुर्केगु, सेक्सया खँ न्यनेगु ।
जिं दकले न्हापां रमेशयात युनिभर्सिटी अफ टेक्सास, आर्लिंगटनय् नापलाःगु खः । जि थन म्यानेजमेण्टय् ब्याचलर यायेत वयाम्ह । व थन मास कम्यूनिकेसनय् ग्राजुयत यायेत ब्वना च्वंम्ह । दकले न्हापां रमेश टेक्सास वेल्सियन युनिभर्सिर्टीइ भर्ना जुया ब्वंम्ह  । तर अन स्वया थन भचा धेबा नं दँ अले स्कोलरसिप नं काये खंगुलिं छगू सेमेष्टर लिपा थन हे ट्रान्सफर जुया ब्वं वम्ह खनि । जि थन वया बलय् व दछि पुलां जुइ धुंकल । जि डालासया छकू अपार्टमेण्टय् स्वम्ह मिसा पासापिं नाप च्वना ब्वना च्वनाम्ह । कलेजय् वयेत गुबलें सु पासां तया बी, गुबले सु पासां तयाबी । निकू बेडरुमय् प्यम्ह पासापिं च्वनाच्वनापिं जिमिगु निगः कार दु । व निगः कार हे शेयर यानां जिमिसं न्ह्याथासं वये वनेगु याना च्वनागु ।
म्ह्स्यूगु प्यलाः लिपा जिं छन्हु रमेशयात धयाः – ‘जितः नं छि च्वंच्वनागु अपार्टमेण्टय् कोथा खालि दःसा धया बिया दिसँ, अले गनं ज्या दःसा नं धया बिया दिसँ ।’
धयागु न्यान्हू लिपाः हे रमेशं धाल – ‘का कोथा खाली जुल । गुबले च्वं झायेगु खः । मेपिसं मका नि बलय् हे सरे जुया दीसा बांलाई ।’
जि कन्हय् कुन्हु हे सरे जुयाः । खास सामान दुगु ला खः हे मखु । छुं सुटकेस व छुं थलबल जक खः । अले छगू वाः लिपाः हे रमेशं मान्सफिल्डया पण्डा एक्सप्रेसय् मनू माःगु दु धाल । छि वना न्यना दिसं धकाः ठेगाना नं बिल । जि अन वनाः इन्टरभ्यू बियाः पास नं जुल । रमेश नं अन हे ज्या यानाच्वंगु जुया च्वन । जिपिं निम्ह छगू हे थासय्, छगू हे इलय् ज्या यायेगु जुसेंलि जि रमेशया गाडी हे अफिस वये, वने यायेगु याना । जिमि निम्हेसिया छगू हे बिल्डिंगय् थःथःगु अपार्टमेण्ट । ज्या नं निम्हेसियां छथाये जू बलय् जिपिं सत्तिना वन । सत्तिना वं लिसे पासापिनि दथुइ शंका उपशंका ब्वलन ।
जितः जि ज्या याये थाय्या पासापिसं न्यनिगु – ‘रमेश छिमि ब्वाय्फ्रेण्ड खः ला ? कलेजया पासापिसं न्यनिगु रमेश छिमि ब्वाय्फ्रेण्ड खः ला ? छिपिं लिभिंग टुगेडर च्वच्वनागु खः ला ? छिमि ब्याहा याये धुन ला ? आदि आदि । अथे धाइ बलय् जिगु ख्वाः ह्याउँसे च्वनिगु । जितः मछालापुसे च्वनिगु ।
खः जिमि यः त्यः जुयाच्वंगु दु । जिं वयात ययेका च्वनागु दु । वं जितः ययेका च्वंगु दु । थ्व ल्याखँ जि वया गर्लफ्रेण्ड, व जिम्ह ब्वाय्फ्रेण्ड जुइमाःगु खः । तर जिं वयात तछ्याना ब्वाय्फ्रेण्ड धायेफूगु मखु । वं जितः तछ्याना गर्लफ्रेण्ड धायेफूगु मखु । तर अथेखःसां पासापिसं न्यनिबलय् जिं पासापिन्त रमेश जिमि ब्वाय्फ्रेण्ड खः धायेगु । थ्व जिगु लागि सुरक्षाया अनुभूति नं खः । थन सुयां ब्वाय्फ्रेण्ड व गर्लफ्रेण्ड जुल कि मेपिसं मिखा तइमखु । रमेशं थः पासापिन्त जि वयाः गर्लफ्रेण्ड धाः मधाः जिं मस्यू । वयाः मिसा पासा ला कम हे जक दु तर वयाः मिजं पासापिसं नं जितः मेगु मिखां मस्वः ।
रमेशं जितः थःगु मतिना तःक्व हे प्वंके धुंकल । ज्यू सा नापं च्वनेत नं अप्रत्यक्ष रुपं यक्वः प्रस्ताव तये धुंकल । तर इहिपाः न्ह्यः हे जि वया नाप च्वने मछु । जि वया नाप शारीरिक सम्बन्ध कायम याये मफु । रमेशं पिनेवःपिं मिजं मिसात नापं च्वना थःगु अध्ययन व जीवन सुथां लाक्क न्हयाकाच्वंगु खँ यक्वः कने धुंकल । खय्त नं नापं च्वन कि नयेगु,  च्वनेगु खर्च यक्वः म्हो जुइ । न्ह्यागु इलय् नं सरसल्लाह याये दइ । अले दुःख व सुखय् छम्हेस्यां मेम्हेसित ग्वाहालि याये दइ । जब यः त्यः हे जुइ धुंकुसेंलि जिपिं थन बिस्कं च्वच्वनेमाःगु आवश्यकता नं मदु । थन नापं च्वंसां, शारीसिक सम्वन्ध तःसां सुनां सुयातं छुं  धाइ मखु । यद्यपि जिगु संस्कारं जितः थथे यायेत आँत बियाच्वंगु मदु । सखे जिमि मां, बौ, दाजु, किजा, तता केहेँ व समाजं छु धाइ धइगु ग्याचिकू जिके दुसुना च्वंगु दु । जितः रमेशं क्वाकेत नं यक्व स्वये धुंकल । वं जितः घयेपुइ । चुप्पा नई । तर वया ल्हा संवेदनशील थासय् थ्यन कि जितः जिगु संस्कारं सचेत याई । जि लिचिले । । जिं वयात धाये – इहिपाः धुंका तिनि ! व हिस्स जुइ । तर अथेखःसां व तँ चाइ मखु । जितः ह्यय्केत सनि ।
तर इहिपाः !
इहिपाःया पा वइगु गुबलय् ? ईहिपाः जुइगु गुबलय् ? न वं स्यू, न जिं स्यू । जिपिं नेपाः वने फइगु स्थिति मदय् धुंकल । जिमिगु भिसा फुइ धुंकल । नेपाः वन कि अमेरिका लिहां वये फइगु चान्स कम हे जक जुइ धुंकल । जिमिसं अमेरिका त्वते मफू । अमेरिका जिमिगु लागि छगू आवश्यकता जुइ धुंकूगु दु ।
जिमिगु ग्राजुयसनया इलय् मां, बौयात सःता जिमिगु सम्बन्धया बारे थन हे कनाः थन हे म्हो इलय् इहिपाः याये धइगु म्हगस नं म्हगस हे जक जुल । ग्राजुयशनया इलय् जिमिसं थः मां, बायात इन्भाइटेशन लेटर छ्वयाः । स्यू, ग्राजुयशनया इलय् अभिभावकपिं वयेत यक्वः भिसाया चान्स दु । तर वया मां, बौया भिसा लगे जुल तर जिमि मां, बायात अमेरिका वयेत भिसा मबील । वया मां, बौ वयाः वन । तर जिमिसं जिमिगु स्थिति व सम्बन्धया बारे छुं कनेमफु । तर नं वयाः मां बौ नं जिमित नापनापं खनाः जिमिगु सम्बन्धया वारे अनुमान याये धुंकूगु जुइफु । तर अनुमान याना छु हे जुइ ? नेपाः वनाः इहिपाः याये फइगु अवस्था जिमिके मदु । मां बौ वयाः इहिपाः याना बिइगु अवस्था गुबले वइगु खः छुं अनुमान मदु । तर नं .... ।
– ‘रीता जिं छंके छता खँ न्यने धइगु ?’ रमेशया भावुक सः नं जिगु बिचाः छताछुल्ल जुल ।
– ‘हँ ... ।’ जिं थुलि हे जक धयाः ।
– ‘जि थौं चःछि द्यने मफु । चःछि जि झी निम्हेसिगु सम्बन्धया वारे न्ह्यसः लिसःलय् तक्यना च्वना । झिपिं थथे बाया च्वना बां लाइ ला ? लिभिंग टुगेडर (मिजंमिसा नापं च्वनेगु) हे च्वने माःगु खः ला ? लिभ इन सिन (ईहिपाः जुइधुंकूपिं मिजं मिसाथें छथासं च्वनेगु) जुइगु खः ला ? झीगु सम्बन्धया घःचा न्ह्यागू नं खुदँ दये धुंकल । तर सम्बन्ध खुदँ दःसां अमेरिकाय् च्वना नं झी थःगु संस्कारय् तःक्यना थःत कसाः नकाः च्वना । थ्व पाय्छि खः ला ?’ रमेशया गम्भिर व भावुक सः थ्वया च्वन । जिं वयात स्वयाः च्वनाः ।
– ‘झी नेपाः वना इहिपा याः वने फूगु नं मखु । न त मां बौ सःता थन हे इहिपाः याये फूगु खः । थथे जब इहिपाः याये फइगु स्थिति हे मदु धाःसा लिभिंग टुगेडर जुयाः च्वंसा मज्यू ला ? बरु थन हे कोर्ट म्यारिज याये । नापं च्वने ।’
जिं रमेशयात ज्यू, मज्यू छुं धाये फूगु मखु । जि क्वछुना वयागु खँ न्यना जक च्वनाः । केबल न्यनाः च्वनाः । वयागु गम्भिर व भावुक सः कोथाय् थ्वया च्वन । तर जि सुम्क । जिगु म्हुतु वां मखाः । जिगु छयँ धः मस्वाः । जिं स्यू, रमेशं जितः यक्व मतिना याः । जिं नं वयात ययेका च्वनागु दु तर नं थ्व न्ह्यसःया स्पष्ट लिसः जिं बिइ मफु । थ्व जिगु कमजोरी वा कातरता नं जुइफु । जिगु क्वछुना च्वंगु छ्यँ खनाः खः वा जि सुम्क च्वच्वनागु खनाः खः रमेशया सः बुलुहुँ तना वन ।
सः ताये मन्तसेंलिं जिं छयँ धःस्वाका । व जिगु न्ह्योने मदु । व दनाः ग्याँस भुतुलिई सना च्वने धुंकल ।
– ‘च्या त्वनेगु खः ला ? जितः ला च्या त्वने मास्ति वल । वने न त्यइन ।’ रमेशं धाल ।
जिं ल्हातय् च्वंगु घडी स्वयाः पौने चार जुइ धुंकल । गुलि याकनं ई फूगु । च्या त्वनेगु धइकथं जिं छ्यँ संकाः । वं च्या दाय्का हल । च्या त्वना । लँलि फिना जिपिं व मिसा मचा काय्त वना ।
गाडी रमेशं चले यात । जि वया लिकसं च्वना जव व न्ह्योने च्वंगु लकस स्वस्वं वनाः । तर जिगु मिखा जवः व न्ह्योनेया लकसय् ब्वाँय् वना च्वंसां मन धाःसा कोथाय् रमेशं धाःगु खँय् जक तक्यना च्वन । झिपिं लिभिंग टुगेडर हे च्वने माःगु खः ला ? झिपिं लिभिंग टुगेडर हे च्वने माःगु खः ला ? झिपिं लिभिंग टुगेडरय् च्वने मज्यूला ?  ..... ।
– ‘झिसं काः वनेत्यनाम्ह मिसा मचाया नां छु धयागु ?’ मचाय्कः हे जिगु म्हुतु सः पिज्वल ।
– ‘वया नां ला ... !’ हिसिला धाःगु थें च्वँ ।
– ‘तःसकं हे हिसि दुम्ह कि छु ?’ जिगु सः गम्भिर जुल ।
तर रमेशं जिगु गम्भिर सः यात थुइके मफू । वं अथें साधारण लिसः बिल – ‘अथे हे जुया ला हिसिला धाःगु जुइ ।’ थुलि धयाः रमेश न्हिल । तर जि न्हिले मफू । जिके न्हिलासु पिमदं ।
टाफिक जामं याना जिपि सवः पाचय् तिनि व मिसायात रिसिभ यायेगु गेटय् थ्यन । फेसबुकय् च्वंगु हिसिलाया ख्वाःपाः लुमंकाः रमेश न्ह्या वन । जि वयाः ल्यू ल्यू वनाः ।
– ‘छि हे मखुला रमेशजी धाधां छम्ह हिसिचा दुम्ह मिसां रमेशयात कसिक्क घय् पुल ।’ जि थारा न्हुल । रमेश थारा न्हू, मन्हू जिं तिफ्याये मफू । तर रमेशया ख्वापा नं व नं अक्कमक्क जूगु कना च्वन ।
रमेशयात घयुपुम्ह मिसा मचा बांला । व निदँति दुम्ह थें च्वं । वया ऊन बांला । करिब पाँच फुट ति हाइट दुम्ह व मिसाया मिखा ग्वःग्वः ला । ख्वाः चाकला । ख्वालय् न्हिलासु दु । व गाक्क हे आधुनिक खनेदु । अले अमेरिकाय् यायेमाःगु व्यवहार नं वं स्यू थें च्वं । नत्रसा व मिसां थुलि याकनं रमेशयात घय्पुना थःगु खुसी थथेयाना प्वंके फइगु खइमखु ।
अले झिंखुगू घण्टाया यात्राया त्यानुया भाव वयाके छुं चिं खनेमदु । मानौं वयागु गन्तव्य अमेरिका खः । थ्व थौं पुरा जूगु दु । वयागु म्हगस पूवंगु दु । व ल्यासे मिसा खनाः जितः ईष्र्या ब्वलन । रमेशयात वं घय्पुगु खनाः गुलि मछा मजुम्ह मिसा धइथें ताल । 
– ‘जि हिसिला ।’ व हे ल्यासेम्ह मिसां थःगु म्हसिका बिल ।
– ‘ऐ ... छ हे ला हिसिला’ धाधां रमेश थःगु ख्वाः चकंकल । थ्व पालय् रमेशं हिसिलायात हग (घये) यात । जि झं थारा न्हुल । जिगु मन भाराभारा मिन । गनं थुपिं न्ह्याबलें थथे हे घय्पुना जुइगु जकं खः ला ? जिगु जीवनया छगः नःगु सुनानं लाका काइथें जितः ताल । 
अले जिगु म्हुतुं अनायस हे सः पिज्वल – रमेश झी थौं निसें हे लिभिंग टुगेडर च्वने मालि । झि लिभ इन सिन जुइमाली ।