Newa Ekata Diwas Gosthi Adv

लिभरपुल दकले न्ह्यःने

नेवा: अनलाइन न्युज – ललेन्द्र शाक्य | २०७७ मङ्सिर १४, आइतबार १२:२३:०९

साविक विजेता लिभरपुल ब्राइटनलिसे बराबरी जूसां नं प्रिमियर लिगया शीर्ष थासय् थाहाँ वंगु दु । शनिवाः जूगु कासाय् भिएआर रेफ्रीं लिभरपुलया निगू गोलयात मान्यता मब्यूबलय् ब्रायटनलिसे छगू छगू गोलया बराबरीइ कासा क्वचाःगु खः ।

ब्राइटनं घरेलु मैदानय् लिभरपुलयात न्हापांगु हाफय् बराबरीइ पंगु खः । तर डिएगो जोटां गोल यासें लिभरपुलयात अग्रता ब्यूगु खः । इन्जरीइलय् ब्राइटनं पेनाल्टी काल व वहे गोल यासें बुइगुपाखें बचेजुइत ताःलात ।

घरेलु मैदानय् कासाया २० औं मिनेटय् ब्राइटनं गोल यायेगु मौका गुमेयाःगु खः । आरोन कोनोलीयात फल यायेधुंकाः काःगु पेनाल्टी ब्राइटनया निल मर्फीं पोष्ट पिने प्रहार याःगु खः ।

अथेहे ३४ औं मिनेटय् लिभरपुलंनं अग्रता कायेगु ह्वःता गुमेयात । मोहम्मद सालाहं गोल याःसां नं भिएआरं मान्यता मबिल व अफसाइड घोषित यात ।

६० औं मिनेटय् जोटां गोल यासें लिभरपुलयात अग्रता बिल । ८४ औं मिनेटय् साडियो मानें गोल याःसां नं भिएआर रेफ्रीं मान्यता मब्यूबलय् लिभरपुल अग्रता दोब्बर यायेगुपाखें चुकेजुल ।

तर इन्जुरी ईया निगूगु मिनेटय् ब्राइटनं धाःसा भिएआरया ग्वाहालिं पेनाल्टी काल व पास्कल ग्रोसं गोल यासें कासा बराबरी यायेत ताःलात । एण्ड रोर्टसनं डानी वेलब्याकयात फल यायेधुंकाः रेफ्रीं भिएआरया ग्वाहालिं ब्राइटनयात पेनाल्टी ब्यूगु खः ।

बरारीलिपा नं १० गू कासापाखें २१ ल्याः मुंकाः लिभरपुल शीर्ष थासय् लाःगु दु । छगू कासा म्हो म्हितूगु टोटनहम २० ल्याःलिसें निगूगु थासय् दु ।

Categorized in कासा