nepal investment baink

लिबियाया डेर्नाय् लँपुइ सीपिं जक लुल

नेवा: अनलाइन न्युज | २०८० भाद्र ३१, आइतबार १४:४२:५९

लिबिया खुसिबाः– डेर्नाय् जक द्वःछि व स्वसःम्ह सित

लिबियाय् ड्यानियल आँधीलिसें वःगु मुसलधारे वां भीषण खुसिबाः हःबलय् ज्यान गुमेयाःपिनिगु ल्याः विरोधाभासपूर्ण वयाच्वंगु इलय् पूर्वी सहर डेर्नाय् जक द्वःछि व स्वसःम्हेस्यां ज्यान गुमेयाःगु संयुक्त राष्ट्रसंघं जानकारी ब्यूगु दु ।

लिबियाया रेडक्रिसेन्टयात उद्धृत यासें संयुक्त राष्ट्रसंघं अद्यावधिक याःगु धलः कथं उगु सहरया झिद्वः सच्छिम्ह अझ न बेपत्ता जुयाच्वंगु दुसा डेर्ना बाहेक  मेमेथाय् १७० म्ह सीगु दु ।

खोज व उद्धार पुचः पीडितयात जीवित लुयावइगु आशय् नालय् मालेगु व भग्नावशेषय् मालेगु ज्या यानाच्वंगुलिं सीपिनिगु ल्याः अझ अप्वयेफूगु आशंका याःगु उगु विश्व संस्थां धाःगु दु । थ्वसिबें न्ह्यः विश्व स्वास्थ्य संगठन (डब्ल्यूएचओ)या अधिकारपिन्सं स्वद्वः व ९९८ म्ह सीम्ह लुयावःगु जानकारी ब्यूगु खः ।

वंगु आइतवाः न्हिनय् आँधी वयेधुंकाः मुसलधारे वा वयाः निगू खुसिइ तयातःगु निगू बाँध चुइकेधुंकाः खुसिबालं गां सहरया भवन व उकी च्वनाच्वंपिन्त चुइकाः यंकूगु खः ।

खुसिबाः विनाशबाहेक डेर्नाय् छुं खनेमदु । सामाजिक संघसंस्थाया प्रतिनिधि ध्याचलय् ल्हानाच्वंगु सीम्ह लिकायेत व उकिया व्यवस्थापनय् व्यस्त जुयाच्वंगु दु । डेर्नाय् मानवीय अवस्था भयावह जूगु व त्वनेगु लःया गम्भीर समस्या जूगु उद्धारकःमिपिन्सं धाःगु दु ।

खुसिबाःपाखें सर्वाधिक प्रभावित पूर्वी सहर डेर्नाय् कम्ती नं स्वीद्वःम्ह लिबियाली घरबारविहीन जूगु आप्रवासन सम्बन्धी अन्तर्राष्ट्रिय संगठन (आई ओ एमं) वंगु शुक्रवाः धाःगु खः ।

९० हजार जनसंख्या दूगु डेर्नाय आः न्ह्याथाय् नं सीम्ह जक खनेदयाच्वंगु उद्धारकर्ता व सामाजिक संघसंस्थायात सीम्ह व्यवस्थापन अतिकं चुनौतीपूर्ण जूगु दु । सुडान व इजिप्टया प्यसःम्ह विदेशीया नं खुसिबालय् लानाः सीगु दु । आःतक स्वद्वः व १९० म्हेसिगु अन्त्येष्टि याःगु जानकारी ब्यूगु दु ।

थ्वहे दथुइ, पूर्वी लिबियाया बन्दरगाह सहर डेर्नाया प्रमुख अब्दुलमेनम अलगैथीधचया कथं खुसिबालय् लानाः झिंच्याद्वःनिसें नीद्वःम्ह मनूत सीगु दु । निगू बाँध तज्यानाः डेर्ना नगर व जःखःया जिल्लाया बासिन्दाया तथ्यांकय् आधारित जुयाः वं उलि अप्वः लिबियालीं ज्यान गुमेयाःगु धाःगु खः ।

डेर्ना व जःखःया जिल्लाय् जूगु अकल्पनीय विनाशया आधारय् सीपिनिगु ल्याः नीद्वःया हाराहारीइ थ्यंगु अल अरेबिया टिभीयात वं धाःगु दु ।

Categorized in अन्तर्राष्ट्रिय