लानिपुखू : सर्वसाधारणया नितिं चाल
नेवा: अनलाइन न्युज – ललेन्द्र शाक्य | २०७९ चैत्र १०, शुक्रबार ११:३१:४७
लानिपुखू (रानी पोखरी) पुनःनिर्माणलिपा न्हापांगुखुसि सर्वसाधारणया नितिं चाःगु दु ।
महानगर प्रहरीं सुचुपिचु यानाः बुधवाःनिसें सर्वसाधारणया नितिं लानिपुखू खुल्ला याःगु येँ महानगरपालिकाया प्रवक्ता नविन मानन्धरं जानकारी बियादीगु दु ।
प्रवक्ता मानन्धरया कथं लानिपुखुली आः सर्वसाधारण विना टिकट अवलोकन यायेत वनेखनीगु जूगु दु ।
प्रवक्ता मानन्धरं धाःगु दु, ‘पुनःनिर्माणलिपा महानगरं तःक्वःमछि सर्वसाधारणया नितिं खुल्ला यायेत पहल यानाः वयाच्वंगु खः । बुधवाःनिसें औपचारिक रुपं चाःसां नं थौं शुक्रवाःनिसें मनूत लानिपुखुली अवलोकनया नितिं वःगु दु ।’
२०७२ बैशाखया तःभुखाचं क्षति जुइधुंकाः पुनःनिर्माण यानाः लानिपुखूयात पुलांगु हे स्वरुप ब्यूगु खः ।
तत्कालीन राष्ट्रिय पुनःनिर्माण प्राधिकरणं २०७८ पुस ८ गते हे महानगरयात लानिपुखू लःल्हाःसां नं सर्वसाधारणया नितिं खुल्ला मयाःगु खः । ताःई बन्द जूबलय् व मर्मत सम्भार नं मजूबलय् झारपात ब्वयाः वयाः लानिपुखू कुरुप जूगु खः । आः धाःसा सुचुपिचु यानाः लानिपुखू चिटिक्क याःगु येँ महानगरपालिकां जानकारी ब्यूगु दु ।
Categorized in स्थानिय-समाज