nepal investment baink

लातां नइ छत्यांग्रा, बाठां नइ प्यत्यांग्रा, आः प्रचण्डं न्ह्याग्गु याःसां नं छुं जुइमखुत : चित्रबहादुर केसी

नेवा: अनलाइन न्युज – ललेन्द्र शाक्य | नेपाल संवत ११४४ दिल्लाथ्व तृतीया (२०८१ असार २५ गते) मंगलवाः

राष्ट्रिय जनमोर्चाया नायः लिसें सांसद चित्रबहादुर केसीं प्रधानमन्त्री पुष्पकमल दाहाल प्रचण्डया ल्हाःतं सत्ता फुत्के जुइधुंकूगु टिप्पणी याःगु दु ।

प्रतिनिधिसभा बैठकय् न्वःवासें सांसद केसीं प्रचण्ड सत्ताया नितिं बालकोट व भुइजःसि ब्वां जूगु हुनिं थ्व हालत जूगु धाःगु दु ।

सांसद केसीं धाःगु दु, “आः प्रधानमन्त्रीं कासा थुइकेमफुत । पुस १० गते छि गन थ्यंकादीगु खः, वहे दिंनिसें दशा धारण याःगु खः । छिं थुइके मफुत । छि ग्वःक्वः बालकोट व भुइजःसि थ्यंकादिया । थथे न्ह्याइ ला राजनीति ? लिपांगुखुसि छितः न्यादँया नितिं सत्ता व शक्तिइ तयेत संसद दुनेया निगूगु पार्टी ल्वाकज्याःगु मदु ।”

पुलांम्ह उपप्रधानमन्त्री तकं जुइधुंकूम्ह सांसद केसीं प्रचण्ड आपालं उत्ताउलो जूगु हे हुनिं लातां नइ छत्यांग्रा, बाठा नइ प्यत्यांग्रा धाःथें अवस्थाय् थ्यंगु धाःगु दु ।

\सांसद केसीं धाःगु दु, “लातां नइ छत्यांग्रा, बाठां नइ प्यत्यांग्रा धाःथें छिसं बल्ल भागेयात । छिकपिनिगु मन्त्रिमण्डल गठन जूबलय् हे तःधंगु पार्टीं अर्थ व गृहमन्त्रालय छाय् मकाल, जि राजनीति मथूम्ह मनुखं हे नं अड्कल यानागु खः । दालमें काला हे, भुइजःसिं थःगु पार्टी दुने छुं विवाद जूगु हुनियात आधार दयेकाः फुत्त बालकोट थ्यंकल, उकिया परिणाम भागेयाःगु दु । आः छिं न्ह्याग्गु याःसां नं छुं जुइमखुत ।”

Categorized in राजनीति