coved ad

लमजुङय् जिप फातापुल : स्वम्ह सित, गुम्ह घाःपाः

नेवा: अनलाइन न्युज – ललेन्द्र शाक्य | २०७८ मङ्सिर २३, बिहिबार १३:५६:२६

लमजुङय् शिक्षक, विद्यार्थी च्वनावंगु जिप फातापुलाः स्वम्ह सीगु दुसा गुम्ह घाःपाः जूगु दु ।

ग१ज ६३१७ ल्याःया जिप मर्स्याङ्दी गाउँपालिकाय् दुर्घटना जूगु खः । गणेश माध्यमिक विद्यालयया शिक्षक, विद्यार्थी ‘पिस हिल’ धैगु थासय् शैक्षिक भ्रमणया नितिं वनाच्वंगु जिप दुर्घटनाय् लाःगु लमजुङया प्रमुख जिल्ला अधिकारी सुशील वैद्यं जानकारी ब्यूगु दु ।

सिडिओ वैद्यं धाःगु दु, ‘शिक्षक, विद्यार्थी जानाः स्वंगः जिपय् पिस हिल धैगु थासय् शैक्षिक भ्र्रमणया नितिं वनाच्वंगु खः । वमध्ये छगः जिप दुर्घटना जुयाः छम्ह विद्यार्थी, छम्ह शिक्षक व छम्ह स्थानीय सीगु खबर वःगु दु । गुम्ह घाःपाः जूगु वमध्ये निम्हेसित चितवनय् वासः यायेगु नितिं छ्वःगु दु व न्हयम्हेसिगु जिल्ला अस्पताल लमजुङय् वासः जुयाच्वंगु दु ।’

घटनाया विस्तृत जानकारी वयेल्यंदनीगु नं सिडिओ वैद्यं धाःगु दु । घटनास्थलय् प्रहरी थ्यंकेधुंकूगु व स्थानीयपिन्सं घाःपाः जूपिनिगु उद्धार याःगु वैद्यं जानकारी ब्यूगु दु ।

जिपय् १६ म्ह च्वनावंगु खः । मर्स्याङ्दी गाउँपलिका वडा ल्याः ८ भुस्मे धैगु थासय् जिप फातापूगु खः । मर्स्याङ्दी गाउँपालिका ८ या खुँदी सिमपानी धैगु थासं भुस्मेपाखे वनाच्वंगु जिप फातापूगु व इपिं पिकनिकय् वनाच्वंगु जानकारीइ वःगु लमजुङया डिएसपी कृष्ण कार्कीं जानकारी ब्यूगु दु ।

Categorized in दुर्घटना-अपराध