zero media family planning adv

लकडाउन छ्वासुकेत सीसीएमसी व उच्चस्तरीय समितिया प्रस्ताव मर्ज

नेवा: अनलाइन न्युज – ललेन्द्र शाक्य | २०७७ जेठ २५, आइतबार १२:४७:२०

उपप्रधानमन्त्री ईश्वर पोखरेलया नेतृत्वय् दूगु कोभिड १९ नोबेल कोरोना भाइरस रोकथाम व नियन्त्रण उच्चस्तरीय समितिं लकडाउन छ्वासुकेगु प्रस्ताव तयार यानाः थौं आइतवाः मन्त्रिपरिषदय् यंकूगु दु । लकडाउनया मोडालिटीयात लिपांगु रुप बिइत थौं आइतवाः हे सनिलतक मन्त्रिपरिषद बैठक च्वनीगु उच्च स्रोतं धाःगु दु ।

जेठ १७ गते च्वंगु मन्त्रिपरिषद बैठकं उच्चस्तरीय समितियात लकडाउनया मोडालिटी तय यायेगु भाला ब्यूगु खः । क्याबिनेटं निर्देशन ब्यूगु च्यान्हु लिपा बल्ल उच्चस्तरीय समितिं लकडाउनयात चरणबद्ध रुपं छ्वासुकेगु मोडालिटीयात लिपांगु रुप बिइत्यंगु खः ।

थ्व दथुइ जेठ २२ गते नं बालुवाटारय् मन्त्रिपरिषदया बैठक च्वंगु खः । तर, उगु बैठकय् उच्चस्तरीय समितिं लकडाउनया मोडेल न्ह्यब्वये मफूगु खः ।

सरकारं लकडाउनया मोडालिटी तय याये मफयाच्वंगु हे इलय् येँ लिसें थीथी सहरय् जनस्तरपाखें लकडाउनयात छ्वासुकेगु क्रम न्ह्याये धुंकूगु दु । आइतवाः नं येँ लिसेंया सहरय् आपालं पसःत चाःगु दु । सतकय् सवारी साधान आपालं खनेदूगु दु ।

सरकारी अलमल

थ्वहे दथुइ उच्चस्तरीय समितिं जेठ २५ गते निसें हे लकडाउन छ्वासुकेगु, १०० सिबें म्हो कोरोना संक्रमित जूगु जिल्लाय् आन्तरिक सवारीसाधन चलेयाके बिइगु, असार १ निसें आन्तरिक हवाई उडान संचालन यायेगु व ताःहाकःगु दुरीया यातायात चलेयायेगु लिसेंया प्रस्ताव तयार याःगु खः ।

असार १७ गतेनिसें शैक्षिक संस्थात चायेकेगु उच्चस्तरीय समिति. प्रस्ताव तयार याःगु खः । तर, थौं जेठ २५ गते जुइधुंकूसां नं थ्व प्रस्ताव कार्यान्वयनय् वयेमफुत । उपप्रधानमन्त्रीं तयार याःगु प्रस्तावय् नेपाली सेनां असहमति प्वंकूबलय् लिपालाःवंगु स्रोतं धाःगु दु ।

उच्चस्तरीय समितिया हे सचिवालयया रुपं ज्या यायेगु कथं नेपाली सेनाया ब्यारेकय् चायेकुगु कोरोना संकट व्यवस्थापन केन्द्र (सीसीएमसी) एमसीं नं ब्यागलं मोडालिटी तय यानाः उच्चस्तरीय समितिइ न्ह्यब्वःगु दु । थुकिं यानाः ईश्वर पोखरेलया प्रस्ताव छखे, सीसीएमसी मेखे जूवंगु दु । मन्त्रालयया ज्याय् सेना हावी जूगु धासें सरकारय् हे दुपिं गुलिखे मन्त्रीपिं असन्तुष्ट जूगु दु ।

तर, आः उपप्रधानमन्त्री पोखरेलया समिति व सीसीएमसीं तयार याःगु निगुलिं प्रस्तावयात थःथवय् मर्ज यानाः लिपांगु प्रस्ताव तयार यायेगु गृहकार्य उच्चस्तरीय समितिं न्ह्याकूगु दु ।

स्रोतं धाःगु दु कि निगुलिं प्रस्तावयात मर्ज यानाः सीसीएमसीं हप्ताया आधारय् मोडालिटी दयेकुगु लिसें उकियात आm चरण धाःगु दु व आः लकडाउन छ्वासुकेगु मोडालिटी न्हापांगु हप्ता, निगूगु हप्ता मधाःसे न्हापांगु चरण, निगूगु चरण या आधारय् याइगु जुइ, छगू चरण छवाःसिबें अप्वः वनेफु ।

उच्चस्तरीय समितिं दुजः जूपिं मन्त्रीपिन्त शनिवाः प्रस्तावया मस्यौदा इनाब्यूगु दु । उगु मस्यौदाय् सुझावत वयेधुंकाः थौं आइतवाः हे उकियात लिपांगु रुप बियाः मन्त्रिपरिषदय् छ्वइगु स्रोतं धाःगु दु ।

Categorized in राजनीति