2565 buddha Jayanti ADV

लकडाउनय् बैंकं जरिवाना काये मदइगु

नेवा: अनलाइन न्युज – ललेन्द्र शाक्य | २०७८ जेठ ४, मंगलबार १६:३०:१५

नेपाल राष्ट्र बैंकं निषेधाज्ञा ई ज्वःछि ग्राहकपिंपाखें कर्जा असुली यायेबलय् पेनाल्टी वा अतिरिक्त शुल्क मकायेत बैंक व वित्तीय संस्थायात निर्देशन ब्यूगु दु ।

चालु आर्थिक दँया नितिं हःगु मौद्रिक नीति स्वक्वःगु त्रैमासया समीक्षा यासें बैंकं निषेधाज्ञाया इलय् ऋणीपिंके शुल्क मकायेत निर्देशन ब्यूगु खः । 

अथेहे, कोभिड १९ संक्रमण न्यूनीकरणया नितिं जारी जूगु निषेधाज्ञा ई ज्वःछि व उगु ई क्वचाःगु लच्छितक बैंक व वित्तीय संस्थां छुं नं कथंया असुली सम्बन्धी सुचं वा लिलामी सम्बन्धी सुचं जारी यायेमदइगु व्यवस्था मिलेयायेत तकं नेपाल राष्ट्र बैंकं धाःगु दु ।

समीक्षापाखें नेपाल राष्ट्र बैंकं महामारी नियन्त्रणया नितिं संचालन जुइगु उद्योगयात तकं छुं राहत बिइगु धाःगु दु । नेपालय् आः संचालनय् दूगु स्वास्थ्य सेवा प्रदायक संस्था, अस्पताल वा उद्योगयात लिक्वीड अक्सिजन प्लान्ट वा अक्सिजन प्लान्ट पलिस्था यायेगु प्रयोजनया नितिं कर्जा माग जूसा बैंक व वित्तीय संस्थां आधार दरय् हे कर्जा उपलब्ध याकेगु व्यवस्थ मिलेयायेगु नेपाल राष्ट्र बैंकं धाःगु दु ।

अथेहे, नेपालय् आः संचालनय् दूगु स्वास्थ्य सेवा प्रदायक संस्था, अस्पताल वा उद्योगयात लिक्वीड अक्सिजन प्लान्टया नितिं ५० करोड तकातक व अक्सिजन प्लान्ट पलिस्था यायेगु प्रयोजनया नितिं २० करोड तकातकया कर्जायात दच्छिया नितिं विशेष पुनरकर्जा उपलब्ध याकेगु व्यवस्था मिलेयायेगु नेपाल राष्ट्र बैंकं धाःगु दु ।

Categorized in बजाः