kmc bidya

लकडाउनया इलय् रजनी खडगीया इहिपा

नेवा: अनलाइन न्युज – विजयरत्न | २०७७ जेठ ५, सोमबार १२:३१:५९

छम्ह लोकंह्वाःम्ह कलाकार कथं न्ह्यःने लानाच्वंम्ह रजनी खडगीया थ्व लकडाउनया ई दुने आइतवाः सुजन कपालीलिसे इहिपा जुउगु दु ।

ब्या याये म्हाः, पागलपन, एक से एक थेंज्याःगु छुं छुं नेवाः संकिपाय् नं हिरोइन जुया म्हितादी धुंकूम्ह कलाकार रजनी खड्गी नेवाः ख्यालि टिभि सिरियल “समयबजि” ज्याझ्वलय् नं म्हिताः वयाच्वनादीगु दु ।

झिदँति न्ह्यः “बाँला मय्जु” नांयागु ब्युटि कण्टेस्टय् ब्वति कया कलाख्यःया संसारय् दुहाँ वःम्ह रजनी खडगीं आपालं नेवाः म्युजिक मिडियोस मोडल जुया म्हितुगु दुसा “मुसुमुसु न्हिला द हायेकेमते” बोलया म्येया म्युजिक भिडियो तसकं लोकंह्वाःगु खः ।

कलाकारिता व सन्चारया ख्यलय् छम्ह भिडियोग्राफर व फोटोग्राफरया रुपय् ज्या यानाः वयाच्वंम्ह सुजन कपालीलिसे लोकंह्वाःम्ह कलाकार रजनी खडगीया छुं ई न्ह्यःनिसें मतिना ब्याना वयाच्वंगु खःसा वंगु फागुन महिनाय् इमि दथुइ इहिपा क्वछिना इन्गेजमेण्ट जुउगु खः ।

क्वछिना कथं बैशाखय् अक्षय तुतीय (१४ गते) खुन्हु इमि इहिपा जुइगु क्वछिउगु खःसां देशय् लागु यानातःगु लकडाउनया कारणं लिज्याना च्वंगु इहिपा म्हिगः जेठ ४ गते जुउगु खःसा इहिपाया ज्याय् निखलःया छेँजःपिं जक च्वनाः क्वचायेकुगु खः ।

नकतिनि इहिपा जुपिं रजनी खडगी व सुजन कपालीया तिपुयात नेवाःअनलाइनन्युजपाखें भिन्तुना देछाना च्वना ।

Categorized in कला