kmc bidya

लकडाउनया इलय् थःथःगु छेँय् हे च्वना नं संकिपा दयेकल

नेवा: अनलाइन न्युज – विजयरत्न | २०७७ बैशाख २६, शुक्रबार ११:४५:४५

संसारय् न्यंक्कभनं कोरोना भाइरसया महामारी न्यनाः वनाच्वंगु थ्व इलय् थुगु भाइरसपाखें बचेजुया च्वनेत आपालं देशय् लकडाउनया आदेश जारी यानातःगु दुसाः थुकें याना दक्वः ख्यःथें संकिपा ख्यः नं थप्प हे जुयाच्वंगु अवस्था दु ।

कलिउड धकाः धयातःगु खस नेपाली फिल्म ख्यः अले बलिउड धकाः धयातःगु हिन्दी फिल्म ख्यः नं थप्प हे दिनाच्वंगु दुसा नेवाः संकिपा नं थप्प हे दिनाच्वंगु दु ।

थथे दिना च्वंगु थ्व इलय् थ्व ख्यःया छथ्वः संकिपामिपिं जानाः थःथःगु छेँय् हे च्वनाः छगू संकिपाः दयेकाः पितहःगु दु । “लकडाउन छेँय् हे बासं ” नांयागु थ्व संकिपा ३ मिनेट ३६ सेकेण्डया चिसंकिपा खःसा थुकिया निर्माण संयोजन म्हसिका नांयागु ईभेण्ट मेनेजमेण्ट संस्थापाखें जुउगु खः ।

साहित्य, संगीत व कलाकारिता ख्यःयात लकडाउन धकाः थथे कुनातये मजिउ धइगु भावना ज्वनाः थ्व ख्यःयात फयांफत्तले सिर्जनात्मक रुपं छ्यलेमाः धकाः थथे चिसंकिपाः दयेकाःगु खँ थ्व चिसंकिपाःया परिकल्पनाकार व निर्देशक सागर महर्जनं कनादिल ।

सुरज व्यञ्जनकार, रजनी खड्गी, सजिना महर्जन व सिमोन महर्जनपिनिगु अभिनय दुगु थ्व “लकडाउन छेँय् हे बासं”या शुटिंग कलाकारपिन्सं निर्देशक सागर महर्जनया निर्देशन कथं थःथःगु छेँय् हे च्वना मोबाइलया माध्यमं खिचेयानादीगु खः ।

कोरोनाया संक्रमणपाखें थः व थः परिवारयात सुरक्षित यानातःयेगु खःसा आःया अवस्थाय् लकडाउनया आदेश पालना याये हे माः धइगु सन्देश ह्वलेगु कुतः कथं थ्व चिसंकिपाः निर्माण जुउगु खःसा थज्याःगु हे कुतः छुं ई न्ह्यः बलिउडया महानायक धकाः धयातःम्ह अमिताभ बच्चन व प्रियंका चोपडा लगायतया कुतलय् हिन्दी शर्टफिल्म पिदंगु खःसा खस नेपाली भाषं नं थथे छेँय् हे च्वनाः आपालं दयेकाः वयाच्वंगु दु ।

थज्याःगु संकिपाय् सन्दिप क्षेत्रीया निर्देशनय् मदनकृष्ण श्रेष्ठ व हरिवंश आचार्य, दिपकराज गिरी, म्येहालामि संजय श्रेष्ठ व दिपाश्री निरौलाया अभिनय दुगु “लकडाउन ” छगू च्वछाय् बहगु कुतः खः ।

Categorized in कला