2565 buddha Jayanti ADV

लकडाउनया इलय् ज्योति म्युजिक सिंगिङ्ग स्टार कासा

नेवा: अनलाइन न्युज – ललेन्द्र शाक्य | २०७८ जेठ २१, शुक्रबार १३:१३:३६

लकडाउनया ईयात छ्यलाः थःगु साँगितिक प्रतिभा क्यनेगु ह्वताः कथं ज्योति म्युजिकया ग्वसालय् ज्योति सिंगिंङ्ग स्टार कन्टेस्टया नामं छगू सांगितिक कासा जुइगु न्ह्यानाच्वंगु दु ।

नेपालभाषा व खस नेपाली भाषाया बिस्कं बिस्कं कासा कथं न्ह्याइगु थ्व कासाय् ब्वति कायेगु निंतिं वंगु बछलागा पारु (जेष्ठ १३ गते) बिहिवाःनिसें न्हापांगु चरणया नितिं म्ये दुकायेगु ज्या न्ह्यानाच्वंगु दु ।

थ्व कासा स्वंगू वा प्यंगू चरणय् जुइगु खँ ग्वसाः खलःया छम्ह कजि अमोघवीर बज्राचार्यं जानकारी बिउगु दु ।  थ्व कासाया बारेया सुचं दक्व ज्योति म्युजिकया अफिसियल फेसबुक व इन्स्टाग्रामया पेजय् अपलोड जुइगु खँ नं ग्वसाः खलःपाखें जानकारी बिउगु दु ।

थ्व कन्टेस्टय् ल्यःज्याया अनुभवी निर्णायकपाखें जुइ धकाः धाःगु दुसा कासाय् देश व विदेशय् च्वंपिं झिंस्वदँ सिबें च्वये यापिं न्ह्याम्हेसिनं नं ब्वति कायेदइ धकाः धयातःगु दु ।

थुके ब्वति कायेत ज्योति म्युजिकया पेज व युट्युब च्यानल अनिवार्य रुपं लाइक, फलो व सब्स्क्राइब यायेमाःगु नियम दु ।

थ्व कासाय् नेपालभाषा व खस नेपाली भाषा नापं याना निगुलिं भाषाय् न्हाप, लिउ व लियाँल्यु लाःपिन्त  सोलो म्ये रेकर्ड यानाबिइगु खँ दुसा सिरपाः त्याकुपिं खुम्हेसियागु हे म्येया म्युजिक भिडियो नं ज्योति म्युजिकपाखें निर्माण यानाबिइ धकाः धयातःगु दु ।

दुहाँ वःगु भिडियो ज्योति म्युजिकया अफिसियल युट्युब च्यानलय् अपलोड याइगु खःसा निगुलिं भाषाय् सिरपाः त्याकामिपिंन्त थीथी प्याकेजया सिरपाःया व्यवस्था दुउगु खँ नं ग्वसाः खलःपाखें जानकारी बिउगु दु।

थ्व कासाय् ब्वति कायेगु निंतिं jyotimusicnepal2020@gmail.com, amoghabirb@gmail.com, manjil.shakya@gmail.com य् थःथःगु म्ये दुतिनेगु व्यवस्था दुसा  व्यक्तिगत रुपं अमोघवीर बज्राचार्य व  मंजिल शाक्यलिसे नं स्वापू तयेगु व्यवस्था दु । थुके थःगु म्ये दुतिनेगु लिपांगु दिं बछलागा आमै, जेठ २७ गते, क्वःछिना तःगु दु ।

आःतकया दुने पीम्हसिबें अप्वः कासामिपिन्सं म्ये दुतिनेधुंकुगु दुसा ग्वसाः खलःया मन्जिल शाक्यया कथं लकडाउनया इलय् छेँय् दुने उकुसमुकुस जुइकाच्वंपिं प्रतिभा दुपिन्सं नेपालभाषा वा खस नेपाली भाषाया बाँलाक म्ये हालाः इमेल, ह्वाट्स्याप वा भाइबरय् छ्वया हयेफइ धकाः धयादिल ।

Categorized in कला