2565 buddha Jayanti ADV

लकडाउनया इलय् आःतक देय् न्यंकं २०० गू लैङ्गिक हिंसा

नेवा: अनलाइन न्युज – ललेन्द्र शाक्य | २०७८ जेठ २७, बिहिबार ११:३५:४९

कोरोना संक्रमणया हुनिं सरकारं यानातःगु लकडाउनया लच्छिया ई दुने देय् न्यंकं निसः (२००) गू लैङ्गिक हिंसाया घटना जूगु दु ।

हलिंया थीथी मुलुकलिसें नेपालय् नं न्हूगु भेरियन्ट लिसेंया निगूगु चरणया कोरोना संक्रमणया हुनिं जारी लकडाउनया लच्छिया ई दुने महिला पुनःस्थापना केन्द्र (ओरेक) नेपालं याःगु अनुसन्धानय् निगःगू लैङ्गिक हिंसाया घटना जूगु दु ।

केन्द्रया कथं लैङ्गिक हिंसाया निसःगू घटनामध्ये २४ प्रतिशत अर्थात् ४७ म्ह मिसा व मचातय्त यौनिक हिंसाया घटना जूगु दु । केन्द्रया कार्यकारी निर्देशक लुभराज न्यौपानें मुक्कं मुलुक कोरोना महामारीपाखे लक्षित जुयाच्वंगु इलय् मिसा व मचातय्त हत्या, यौनशोषण व बलात्कारथें जाःगु घटना जुयाच्वंगु धाःगु दु ।

केन्द्रया कथं थ्वहे वाः दुने जक स्वंगू यौनजन्य हिंसाया घटना जूगु दु । सुर्खेतया गुर्भाकोट गाउँपालिका ९ दुने छम्ह मिसामचायात मञ्जुरी विना मदिरा सेवन याकाः यौन दुव्र्यवहार याःगु, बाँकेया २२ दँया मिसायात दाइजोय् मोटरसाइकल कायेमखंगु त्वहः तयाः छेँजःपाखें हे हत्या याःगु घटना खः ।

अथेहे, लमजुङङा राइनास नगरपालिका ९ या मोहोेरियाय् च्वंगु स्कूलय् ब्वंकीम्ह शिक्षकं १४ दँया छम्ह मिसामचायात तःक्वःमछि बलात्कार याःगु घटना सार्वजनिक जूगु दु ।

उगु घटनायात कमजोर यायेत मिसामचायात हे थीथी लाञ्छना बियाः दोषी क्यनाः प्रहरीइ तकं उजुरी दर्ता यायेत पंगः ब्वलंकूगु केन्द्रं जानकारी ब्यूगु दु ।

मिसा व मचातय्त थीथी इलय् लैङ्गिक हिंसा व यौन हिंसा जूसां नं घटनायात सुचुकेगु नितिं थीथी त्वहः तःबलय् न्याय कायेगुलि समस्या खनेदूगु उगु केन्द्रं जानकारी ब्यूगु दु ।

गम्भीर प्रकृतिया मानवअधिकार हननया घटना दर्ता, अनुसन्धान प्रक्रियायात प्रभावकारी दयेकाः मिसाया मानवअधिकारया सम्मान व संरक्षण यासें हिंसा प्रभावितया न्याय कायेगु अधिकार सुनिश्चित यायेत महिला पुनःस्थापना केन्द्र (ओरेक) नेपालं सम्बन्धित निकाययाके आग्रह तकं याःगु दु ।

Categorized in दुर्घटना-अपराध