zero media family planning adv

लकडाउनं व्यापार चौपट ः पसः चायेके दयेमाःगु माग यासें आन्दोलन

नेवा: अनलाइन न्युज – ललेन्द्र शाक्य | २०७७ जेठ २०, मंगलबार १६:३२:१०

लकडाउनया हुनिं ब्यापार व्यवसाय चौपट जूगु धासें येँया जोरपातिया व्यवसायीपिन्सं थौं मंगलवाः न्हिनय् प्रदर्शन याःगु दु ।

पसः चायेके दयेमाःगु माग तसें प्रदर्शनय् क्वाहाँ वःपिं व्यवसायीपिन्त प्रहरीं तितरवितर याःगु खः । वहे झ्वलय् पसः बन्द यायेगुलि अटेर याःम्ह छम्हेसित छुं ई नियन्त्रणय् काःगु महानगरीय प्रहरी वृत्त बौद्धया डिएसपी नवीन कार्कीं जानकारी ब्यूगु दु ।

डिएसपी कार्कीं धाःगु दु, “लकडाउन उल्लंघन याःगुलिं नियन्त्रणय् कयागु खः । आः त्वःतेधुनागु दु ।”

गोकर्णेश्वर नगरपालिकाया मेयर सन्तोष चालिसें लिसेंया मनूत लिसे सहलह यायेगु सहमति जुइधुंकाः व्यवसायीपिनसं प्रदर्शन दिकूगु खः । सहलहया झ्वलय् नगरपालिकां पसः चायेकेगु लकसया नितिं पहल यायेगु आश्वासन ब्यूगु दु ।

नगरया प्रशासकीय अधिकृत नरहरी घिमिरें धाःसा थुगु विषयस निर्णय यायेगु अधिकार नगरपालिकायाके मदूगु धाःगु दु । घिमिरे धाःगु दु, “जिमिसं नं थुकी छुं यायेफूगु अवस्था मदु । केन्द्रपाखें न्हूगु निर्णय पियाच्वनागु दु ।”

आः नगरपालिकाया अधिकारीपिन्सं प्रदर्शन यानाच्वंगु पक्षयात सरकारं याकनं हे न्हूगु निर्णय हइगु धयाः ह्ययेकूगु दु ।

जोरपातिइ जक मखु, मेमेगु क्षेत्रया व्यवसायीपिं नं प्रदर्शनय्

जोरपातिइ जक मखु, स्वनिगःया थीथी क्षेत्रया व्यवसायीपिन्सं पसः चायेके दयेमाःगु माग तसें प्रशासन गुहारे यायेगु पलाः न्ह्याकूगु दु । इमिसं लिक्क च्वंगु प्रहरी ज्याकुथि वनाः लिखित निवेदन नं लःल्हाःगु दु ।

अय्सां, थुगु विषयस निर्णय यायेगु अधिकार प्राप्त निकाय प्रहरी प्रशासन मखु ।

येँ प्रहरी परिसर टेकुया छम्ह अधिकृतं धाःगु दु, “बौद्ध, जोरपाति, असं लिसेंया क्षेत्रपाखें डेलिगेसन वःगु दु, जिमिसं प्रशासन ज्याकुथि वनेत सुझाब बियागु दु ।”

लकडाउन थप जुजुं वंबलय् सर्वसाधारणपाखें गुनासो वयेगु क्रम नं अप्वयाच्वंगु उम्ह अधिकृतं धाःगु दु ।

कोरोना भाइरस नियन्त्रणया नितिं सरकारं नेपालय् लकडाउनया घोषणा याःगु ७१ दिं दयेधुंकल । व, थ्व अवधितक थ्यंबलय् लकडाउनं म्वायेत तकं थाकुयाः वःगु धासें लकडाउन छ्वासुकेत जनस्तरपाखें माग जुयाः वयाच्वंगु दु ।

सरकारं धाःसा लकडाउनयात जेठ ३२ गतेतक थप यायेगु निर्णय यायेधुंकूगु दु । अय्सां, सरकारं निर्णययात थप ब्याख्या यानाः छुं थासय् लकडाउन छ्वासुकेफइगु बारे सहलह यानाच्वंगु दु ।

Categorized in स्थानिय-समाज