नेवा: अनलाइन न्युज – ललेन्द्र शाक्य | २०७७ फाल्गुण १४, शुक्रबार १५:१३:४५

येँया कमलपुखूया मौलिकता नष्ट यानाः सिमेन्ट व कंक्रिट छ्यलेत्यंगु विरोधय् वृहत्त नागरिक आन्दोलनं सांकेतिक रुपं पुखू दयेकूगु दु ।

वृहत्त नागरिक आन्दोलनया सहभागीपिन्सं कमलपुखू निर्माणया नितिं येँ महानगरपालिकां निर्माण याःगु सिमेन्ट थुनाब्यूगु दु । पुखुली पलेस्वां (कमल स्वां) ह्वइगु थासय् सिमेन्टया संरचना दयेकाः नक्कली पलेस्वां ह्वयेकेत्यंगु धासें नागरिकपिन्सं विरोध प्रदर्शन याःगु खः । वहे झ्वलय् प्रहरीलिसे आन्दोलनया सहभागीपिनिगु घ्वात्तुघ्वानाः ल्वापु जुइगु स्थिति ब्वलंगु खः ।

वधुंकाः इमिसं चाया सिन्ह तिनाः कमलपुखू मासेयाये दइमखु..., कमलपुखू जनताया खः...धासें नारा थ्वयेकूगु खः ।

आन्दोलनय् सहभागीपिन्सं चाया मौलिक पुखस् दयेकाः लः मुंकूगु खः । इमिसं विकासया नामय् मौलिकता मासेमयायेत आग्रह याःगु दु । पुखूया पलेस्वां ह्वइगु थासय् लः मुंकूगु आन्दोलनय् सहभागीपिन्सं धाःगु दु ।

थ्वसिबें न्ह्यः बृहत्त नागरिक आन्दोलनं थौं शुक्रवाः हे येँया फिब्वख्यलय् प्रदर्शन याःगु खः । वहे झ्वलय् इमिसं स्वनिगःया मूबासीपिन्त बिस्थापित यायेगु कथं जुयाच्वंगु सतकविस्तार दिकेमाःगु, मातृभाषा संरक्षण यायेमाःगु लिसेंया माग तःगु खः ।

Categorized in स्थानिय-समाज