1142 nhoo dan adv

लःया पलेसा अय्ला जक त्वनाः १०७ दँ म्वात एन्टोनियो डोक्याम्पा

२०७२ फाल्गुण २, आइतबार १२:५२:३४

लः, वास्तवय् सजीवत्व जीवतय्गु नितिं जिवनदायिनी तत्व हे खः । लः मत्वंसे मनूत यक्व दिं म्वाये हे फइमखु । तर, छम्ह मनू धाःसा लः हे मत्वंसें १०७ दँ तक म्वायेत ताःलाःगु दु ।

न्यनेबलय् पत्याः हे यायेमफइगु थ्व स्वभाविक हे खः । तर, उत्तर पश्चिम स्पेनया विगो सहरया छम्ह मनुखं थःगु जिवंकाःछि हे लः त्वंहे मत्वंसे सदां अय्लाः जक त्वनाः आः नकतिनि १०७ दँ तक म्वानाः उम्ह मनू मन्त ।

आखिर लः मत्वन धाःसा उम्ह मनुखं छुपाखें लः थःगु म्हगलय् काल ले ? खः उम्ह मनुखं लःया पलेसा अय्लाः जक त्वन ।

समाचारकथं वं थःगु जिवंकाःछि गुबलें नं लः त्वनेगु मयाः । वं लः त्वनेगु पलेसा थःम्हं हे दयेकाः अर्गानिक रेड वाइन त्वन व प्याःचाः लंकेगु यात । वं छेँय् हे दयेकाः रेड वाइन न्हि ४ लिटरतक त्वनेगु याइगु खः ।

एन्टोनियो डोक्याम्पो गासिंया नांया उम्ह मनू १०७ दँतक म्वात ।

जिन्दगीभर लः मत्वंसे व लःया पलेसा अय्लाः त्वनीम्ह मनू नं थुलि यक्व म्वायेफइगु जुयाच्वन । थ्व तथ्यं मदिरापानया हुनिं मनूत याकनं सी धैगु तथ्यायात गनं गलत ला सावित यानाच्वंगु मदुला ? तर, न्ह्याग्गु जूसां उम्ह मनू यक्व म्वात धकाः यक्व अय्लाः त्वनेगु चाहिँ यायेमज्यू खँला ।

वास्तवय् एन्टोनियाया पेशा धैगु हे वाइन दयेकेगु खः । वं दँय् ६० हजार लिटरं मल्याक वाइन उत्पादन यायेगु याइ । व मध्ये ३ हजार लिटर ला थःम्हं हे त्वनेगु याइ । मेगु ल्यंदूगु रेड वाइन मियाः दां कमे यायेगु याइ ।

उगु रेड वाइनपूर्णरुपं रसायन मुक्त व अर्गानिक जुइ । खय्तला व जक मखु । यक्व स्पेनीतय्के रेड वाइन अतिकं त्वनीगु बानी दुपिं दु । रेड वाइनया सेवनं हिया कोलेस्ट्रोल सामान्य जुइगु व क्यान्सरया त्रासपाखें नं मुक्त जुइगु विश्वास इमिके दु ।