kmc bidya

लँपुइ न्यासः वंगु १६ पाः नोट वांछ्वयातःगु अवस्थाय् ...!

नेवा: अनलाइन न्युज – ललेन्द्र शाक्य | २०७७ जेठ ४, आइतबार १४:४८:०८

न्हापा न्हापा जूसां लँपुइ नोट दां लुयावइबलय् मनूतसें खुसुक्क ज्वना वनीगु याइगु खः । सुं सुनां जक प्रहरीयात खबर याइगु खः । तर, लिपांगु इल्य् नोट लुयावःसां नं सुनां नं कायेगु आँट मयाइगु अवस्था ब्वलंगु दु ।

बाराया कोटवाल गाउँपालिका प्युटाहाय् थौं आइतवाः सुथय् उज्वःगु हे घटना जुल । सुथय् ६ः३० ता इलय् लँपुइ नोट लुयावःगु खः । न्यासः वंगु १६ पाः नोट लँपुइ छरेजुयाच्वंगु मनूतसें खनेधुंकाः प्रहरीयात खबर याःगु खः ।

महेन्द्र आदर्श इलाका प्रहरीपाखें खटेजूपिं प्रहरी पुचलं घटनास्थल थ्यंकाः नोट सुरक्षित कथं प्वःच्युंगु खः । 

थुकिया बारे प्रहरीं अनुसन्धान यानाच्वनागु बाराया डिएसपी गौतम मिश्रं जानकारी ब्यूगु दु । मिश्रया कथं नोटयात सुरक्षित तरिकां तयागु व नोट सुयागु खः धैगु बारे मालेगु ज्या जुयाच्वंगु धाःगु दु ।

तर, सुथय् हे नोट लँपुइ छरेजुयाच्वंगु खनेधुंकाः मनूत ग्याःचिकुइ लाःगु खः । वसिबें न्ह्यः जनकपुरय् अथेहे दां छरेजुयाच्वंगु लुयावःगु खः । दां वांछ्वःपिन्त गिरफ्तार यानाः परीक्षण याःबलय् कोरोना भाइरस संक्रमित जूगु रिपोर्ट पिकाःगु खः । दां छरेजुयाच्वंगु लुयावयेधुंकाः स्थानीय ग्याःचिकुइ लाःगु खः ।

Categorized in दुर्घटना-अपराध