kendriya tathyank bhibhag ad

रोजगारीया नितिं देय् त्वःतूपिं युवापिनिगु भिड

नेवा: अनलाइन न्युज – ललेन्द्र शाक्य | २०७८ भाद्र ८, मंगलबार ११:३४:४०

रोजगारीया नितिं देय् त्वःतूपिनिगु त्रिभुवन अन्तर्राष्ट्रिय विमानस्थलय् भिड जूगु दु । मंगलवाः सुथय् विमानस्थलया अन्तर्राष्ट्रिय टर्मिनलय् देय् त्वःताः वनेत्यंपिं आपालं युवापिनिगु भिड जूगु खः ।

दर्जनौं दर्जन नेपाःमि युवापिं विदेश ब्वयेगु नितिं विमानस्थल दुहाँ वनेत लाइन च्वंगु खः । थ्व भिडय् कोरोना संक्रमणपाखें तापाक्क च्वनेत छ्यलेमाःगु भौतिक दूरी नं कायम जूगु खनेमदु ।

नेपाःमि युवाःपिं आपालं खाडी मुलुक वनेत्यंपिं खः । स्वदेशय् हे रोजगारीया ग्यारेन्टी मजुइधुंकाः देस व छेँजः त्वःतेत वाध्य जूगु उपिं युवापिन्सं धाःगु दु ।

वैदेशिक रोजगारीया नितिं वनीपिनिगु थुज्वःगु भिड न्हिथंथें हे जुइगु विमानस्थलया कर्मचारीपिन्सं धाःगु दु । विदेश वनीपिन्त कोरोना भाइरसविरुद्धया खोप काःगु दसिपौ अनिवार्य याःगु दु । थ्वसिबें न्ह्यः टेकु अस्पतालं खोप काःगु दसिपौ काइपिनिगु भिड नं आपालं हे खनेदूगु खः ।

कोरोना संक्रमणया हुनिं वैदेशिक रोजगारी प्रभावित जूगु खः । वंगु दँ असारनिसें वैदेशिक रोजगारीइ वनीगु क्रम भदौनिसें हाकनं सुरु जूगु खः । तर निगूगु लहरया हुनिं अन्तर्राष्ट्रिय उडान हे स्थगित जुइधुंकाः हाकनं नेपाःमि युवापिं विदेश वने मखंगु खः । आः कोरोनाविरुद्धया खोप काःगु दसिलिसें रोजगारीइ वयेत अनुमति बिइधुंकाः हाकनं विदेश वनीपिनिगु क्रम अप्वःगु दु ।

Categorized in लजगाः