nepal investment baink

रेशम व रंजितालिसे ब्यागलं ब्यागलं नापलात प्रचण्डं

नेवा: अनलाइन न्युज – ललेन्द्र शाक्य | ने.सं. ११४४ चिल्लागा अस्तमि (२०८० चैत्र २० गते) मंगलवाः

प्रधानमन्त्री पुष्पकमल दाहाल प्रचण्डं नागरिक उन्मुक्ति पार्टी (नाउपा) या नायः रंजिता श्रेष्ठ चौधरी व संरक्षक रेशम चौधरीलिसे ब्यागलं ब्यागलं नापलाःगु दु ।

थौं मंगलवाः सुथय् रंजितालिसे नापलाःम्ह प्रधानमन्त्री प्रचण्डं न्हिनय् रेशमलिसे नापलानाः सहलह ब्याकूगु खः । सहलह न्हूगु सत्ता समीकरण व प्रदेश सरकारया विष्यास केन्द्रीत जूगु खः ।

रेशम व रंजिता दथुइ मत एकता मजुयाः नाउपा वर्तमान सत्ता गठबन्धनय् आबद्ध मदुसा न्हूगु सत्ता समीकरण कथं सुदूरपश्चिम व लुम्बिनी प्रदेश सरकार नीस्वनेगुलि अन्यौल जूगु दु ।

संरक्षक चौधरीं प्रधानमन्त्री प्रचण्डं सहलहया नितिं सःतेधुंकाः थः वनागु धाःगु दु । चौधरीया कथं प्रधानमन्त्री प्रचण्डं सरकारय् वयेत व न्हूगु समीकरण कथंया सरकारयात समर्थन यायेत आग्रह याःगु खः ।

तर थःम्हं वइगु २३ व २४ गते थःम्हं पार्टीया बैठक सःतूगु व बैठकं गुगु निर्णय याइ वहे कथं जुइगु धयागु जानकारी ब्यूगु दु । वं प्रदेश सरकारयात स्वायत्त जुयाः निर्णय यायेत नं थःम्हं प्रधानमन्त्रीयात धयागु जानकारी ब्यूगु दु ।

सत्ता समीकरण  हिलेधुंकाः पार्टी नायः रंजिता व संरक्षक रेशमदथुइ विवाद अप्वयाः नाउपा विभाजन लिक्क  थ्यंगु दु । रंजितां वर्तमान सत्ता गठबन्धनयात समर्थन याःसांनं वया भाःत रेशम उकिया विपक्षय् दु । थ्वहे विवादया झ्वलय् सोमवाः पार्टी केन्द्रीय ज्याकुथि अनामनगरय् रंजिता व रेश पक्षया नेतापिंदथुइ ल्हाः हे तयाः ल्वापु जूगु खः ।

ल्वापुइ दुथ्याःगु धासें रंजितां नाउपा गण्डकी प्रदेश या नायः राजन गुरुङ व बागमती प्रदेशया नायः दीपबहादुर योञ्जन तामाङयात पार्टीपाखें निष्कासन याःगु खः ।

Categorized in राजनीति