city axpris 2

रेफ्रीयात मुक्का नकेधुंकाः टर्किस सुपर लिगया कासा स्थगित

नेवा: अनलाइन न्युज – ललेन्द्र शाक्य | २०८० मङ्सिर २६, मंगलबार १२:२९:४६

टर्कीइ छगू क्लबया नायः नं रेफ्रीयात मुक्का प्रहार यायेधुंकाः टर्किस सुपर लिगया कासात स्थगित जूगु दु ।

सोमवाः शीर्ष श्रेणी अन्तर्गत एमके ई अन्कारगु कु व कायकुर रिजेस्पो रदथुइ जूगु कासाय् एमके ई अन्कारगु कु या नायः फारुक कोकां मैदानय् दुहाँ वनाः रेफ्रीयात हालिल उमुतमेलरयात मुक्का प्रहार याःगु खः ।

टर्की फुटबल संघया नायः मेहमेत बुयुकेक्सीं धाःगु दु, ‘लिगया फुक्क कासा तत्कालया नितिं स्थगित यानागु दु । थ्व आक्रमण टर्की फुटबलया नितिं लज्जास्पद खः ।’

९७ औं मिनेटय् काएकुरं बराबरी गोल यायेधुंकाः कोका मैदान दुहाँ वःगु खः व रेफ्रीविरुद्ध क्वाहाँ वःगु खः । मुक्का प्रहार जुइधुंकाः रेफ्री मेलर मैदानय् हे क्वःदःगु खः ।

रेफ्री घाःपाः जूगु दु । वयात अस्पताल यंकाः वासः यायेमाःगु खः । वया वासः यायेगुलि दुथ्याःम्ह फिजिसियन डाक्टर मेहमेत युरोबुलुटं तःधंगु घाःपाः धाःसा मदूगु धाःगु दु ।

३७ दँया मेलर टर्की फुटबलया उत्कृष्ट रेफ्रीमध्येया छम्ह खः । फिफाया नितिं अन्तर्राष्ट्रिय कासा म्हितकूम्ह व युइएफएया इलाइट रेफ्री लिस्टय् नं दु ।

Categorized in कासा