nepal investment baink

रुसी विमान युक्रेनया सीमा लिक्क कुतुंवल, ७४ म्ह सित

नेवा: अनलाइन न्युज – ललेन्द्र शाक्य | २०८० माघ ११, बिहिबार १२:४९:१७

चालक दलया खुम्ह दुजःलिसें ७४ म्ह च्वनावंगु छगः रुसी विमान युक्रेनया सीमा लिक्क दुर्घटना जूगु दु ।

रुसी रक्षा मन्त्रालयया कथं इल्युशिन–७६ नांया सैन्य विमान युक्रनेया लिक्क लाःगु बेलगोरोद प्रान्तया याबलोनोवो गामय् दुर्घटना जूगु खः ।

दुर्घटनाय् विमानय् च्वनावंपिं फुक्क ७४ म्ह हे सीगु बीबीसीं जानकारी ब्यूगु दु । रुसी अधिकारीपिनिगु कथं विमानय् ६५ म्ह युक्रेनी बन्दी, खुम्ह चालक दलया दुजः व स्वम्ह एस्कर्ट गार्ड खः ।

उगु विमान युक्रेनं कुतकूगु द्वपं रुसं ब्यूगु दु ।

खार्किभ सीमा क्षेत्रय् तैनाथ युक्रेनी सेनां विमानय् निगः क्षेप्यास्त्र प्रहार याःगु रुसी रक्षा मन्त्रालयं जानकारी ब्यूगु दु । मन्त्रालयं उगु घटनायात ‘आतंकवादी ज्या’ धाःगु दु ।

मन्त्रालयया कथं उगु दुर्घना बुधवाः बेलगोरोदया सीमाय् जूगु बन्दी आदानप्रदाय् सहमति जूगु छुं घौ न्ह्यः जूगु खः ।

थुकिया बारे युक्रेनं धाःसा छुं प्रतिक्रिया ब्यूगु मदुनि । स्थानीय मिडियां सुरुइ रक्षा स्रोतयात उद्धृत यासें युक्रेनी सेनां विमानयात कुतकूगु व उकी क्षेप्यास्त्र दूगु धाःगु खः । लिपा उगु दाबी लितकाये धुंकूगु दु ।

बन्दीपिनिगु आदानप्रदानया नितिं जिम्मेवार अधिकारीमध्येया युक्रेनी जाँच अधिकारी दिमित्रो लुबिनेट्सं थःगु ज्याकुथिं घटनाया अनुसन्धान यानाच्वनागु धाःगु दु ।

Categorized in अन्तर्राष्ट्रिय