prabhu baink new

रुसय् सर्वसाधारणपिन्त कोरोना भ्याक्सिन बिल

नेवा: अनलाइन न्युज – ललेन्द्र शाक्य | २०७७ भाद्र २३, मंगलबार १२:२८:०४

रुसय् कोरोना भाइरसविरुद्धया भ्याक्सिनया उत्पादन सुरु जूगु दु । न्हापांगु चरणया उत्पादन सुरु जूगु रुसी स्वास्थ्य मन्त्रीं जानकारी ब्यूगु दु ।

रुसी समाचार संस्था तासया कथं ...स्पुतनिक भी... नांया कोरोना भाइरसविरुद्धया भ्याक्सिनया न्हापांगु लट उत्पादन जुयाः छ्यलाबुला यायेगु तयारी जूगु दु ।

गेमिलियापाखें विकास याःगु भ्याक्सिनया आवश्यक गुणस्तर परीक्षण जुयाः सर्वसाधारणय् छ्यलाबुला यायेत छ्वयेगु रुसी स्वास्थ्य मन्त्रालयं जानकारी ब्यूगु खः ।

थ्वसिबें न्ह्यः रुसी स्वास्थ्यमन्त्री मिखायल मुरास्कों भ्याक्सिन जोखिमय् ज्या याइपिं शिक्षक, चिकित्सक लिसेंयापिन्त दकले न्हापां बिइगु जानकारी ब्यूगु दु ।

११ अक्टोबरय् भ्याक्सिन अनुमोदन जुयाः रुस कोरोना भाइरसविरुद्ध भ्याक्सिन विकास यानाः अनुमोदन याःम्ह न्हापांगु मुलुक जूगु दु ।

थ्वसिबें न्ह्यः रुसी भ्याक्सिन अनुमोदन जुयाः सेप्टेम्बर महिनाय् हे छ्यलाबुलाय् हयेगु खँ जुइधुंकूगु दु । भ्याक्सिन थ्वहे वाः सर्वसाधारणया नितिं छ्यलाबुलाय् हयेगु धाःगु दु ।

भ्याकिसनया न्हापांगु व निक्वःगु चरणया परीक्षणया अध्ययन ल्यान्सेट जर्नलय् पिदने धुंकूगु दु । तथ्यांकं उगु भ्याक्सिन प्रभावकारी व सुरक्षित जूगु निष्कर्ष पिकाःगु दु ।

स्पुतनिक भी नांया भ्याक्सिन साउदी अरेबिया, युएई, ब्राजिल, फिलिपिन्स लिसेंया देसय् ४०,००० स्वयंसेवीपिन्त परीक्षण जुयाच्वंगु दु ।

आः हलिंन्यंकं १७५ गू भ्याक्सिन विकासया चरणय् दु । गुगुमध्ये ३३ गू मानव परीक्षणया झ्वलय् दु ।

Categorized in अन्तर्राष्ट्रिय