1142 nhoo dan adv

रुसय् छन्हुं हे ३८ हजारम्हेसिके कोरोना संक्रमण ः चीनय् ५२ म्ह संक्रमित

नेवा: अनलाइन न्युज – ललेन्द्र शाक्य | २०७८ कार्तिक ३०, मंगलबार १२:५६:३४

कोरोना भाइरसपाखें छन्हुं हे रुसय् ३८ हजारसिबें अप्वः संक्रमित जुयाच्वंगु इलय् चीनय् धाःसा ५२ म्हे जक न्हूपिं संक्रमित लुयावःगु दु ।

चिनियाँ समाचार संस्थां सोमवाः ब्यूगु जानकारी कथं लिपांगु २४ घौ दुने चीनय् ५२ म्ह जक न्हूपिं संक्रमित थप जूगु दु ।

न्हूपिं थप जूपिंमध्ये नं देय् दुनेपाखें हे संक्रमित जूपिं धाःसा ३२ म्ह जक दूगु राष्ट्रिय स्वास्थ्य आयोगं जानकारी ब्यूगु दु ।

आन्तरिक रुपं संक्रमित जूपिंमध्ये २५ म्ह लिओनिङ्या दुसा निम्ह हेइलोङजियाङ व छम्ह हेबेइ व युनानया खः ।

मेपिं २० म्ह धाःसा विदेशं वःपिंमध्ये खनेदूगु आयोगया अधिकारीपिन्सं जानकारी ब्यूगु दु ।

तर वहे इलय् रुसय् धाःसा ३८ हजार ४२० म्ह न्हूपिं संक्रमित खनेदूगु रुसी अधिकारीपिनिगु धापू दु । थ्वलिसें रुसय् कोरोना भाइरसपाखें आःतक संक्रमितपिनिगु मुक्कं ल्याः ९१ लख ९ हजार ९४ म्ह थ्यंगु दु ।

रुसय् लिपांगु ई मदिक्क औसतय् ४० हजार मनूत कोरोना भाइरसपाखें संक्रमित जूगु लुयावःगु दु । तर ४० हजारसिबें म्हो संक्रमित खनेदूगु सोमवाः स्वन्हुया दिं खः ।

Categorized in अन्तर्राष्ट्रिय