coved ad

रुबी भ्यालीया चलखय् ल्हाःपिं आःतकं लुयामवःनि

नेवा: अनलाइन न्युज – ललेन्द्र शाक्य | २०७८ पौष ३०, शुक्रबार ११:३१:१७

धादिङया रुबी भ्याली गाउँपालिकाय् लँपु म्हुइगु झ्वलय् चलः (पहिरो) कुतुंवयाः ल्हानाः बेपत्ता जूपिनिगु अवस्था आःतकं अज्ञात हे तिनि । नेपाली सेना, सशस्त्र प्रहरी, नेपाल प्रहरी व स्थानीयपिनिगु मंकाः पुचलं मालेगु ज्या यानाच्वंगु दु ।

बिहिवाः सुथय् रुबी भ्याली गाउँपालिका १ य् लँपु म्हुइगु झ्वलय् चलः कुतुंवयाः डोजरलिसें स्वम्ह मनूत ल्हाःगु खः । सनिलतक मालेगु ज्या यायेधुंकाः लुयाः मवयेधुंकाः मालेगु ज्या स्थगित याःगु खः । थौं शुक्रवाः सुथनिसें हाकनं मालेगु ज्या न्ह्याकूगु जिल्ला प्रहरी ज्याकुथि धादिङया प्रवक्ता डिएसपी जागेश्वर भण्डारीं जानकारी ब्यूगु दु ।

डिएसपी भण्डारीं धाःगु दु, ‘चलः कुतुंवःगु थासय् मेसिन ज्याभः छ्यलेफइग्ु अवस्था मदु, मनूतसें हे थःपिन्सं चलः चिइकेमाः । उकिं मालेगु ज्या थाकुयाच्वंगु दु ।’

रसुवा–तिप्लिङ सतकखण्डय् स्वःगु सतकय् चलः कुतुंवयाः डोजरलिसें चालक आकाश तामाङ, सहचालक राजु तामाङ व स्थानीय अनिश तामाङ ल्हाःगु खः ।

बिहिवाः हेलिकोप्टरपाखें नेपाली सेनाया मेजर नेतृत्वया उद्धारकःमिया पुचः उगु थासय् थ्यंकूगु खः । सशस्त्र व नेपाल प्रहरीया पुचः नं बिहिवाः हे उगु थासय् थ्यंकूगु खः । तर ल्वहँलिसेंया चलः कुतुंवःगुलिं न्हिनय् २ ता ईलिपा जक मालेगु ज्या न्ह्याःगु खः ।

बहनी जुइधुंकाः व अतिकं ख्वाउँगु अप्वयेधुंकाः बिहिवाः सनिलय् मालेगु ज्या स्थगित याःगु खः ।

Categorized in दुर्घटना-अपराध