zero media family planning adv

रुकुम थ्यंका प्रचण्डं जनता न्ह्यःने आत्मालोचना यात

नेवा: अनलाइन न्युज – ललेन्द्र शाक्य | २०७७ चैत्र २५, बुधबार १४:३६:२२

जनार्दनयात त्वःताः बादलयात गृहमन्त्री दयेकूगुलिं प्रचण्डया पछुतो

नेकपा माओवादी केन्द्रया नायः पुष्पकमल दाहाल प्रचण्डं रुकुम पश्चिम थ्यंकाः आक्रोश प्वंकूगु लिसेलिसें आत्मालोचना तकं याःगु दु ।

प्रचण्डं तप्यंक हे गृहमन्त्री रामबहादुर थापा बादलयात गृहमन्त्री दयेकाः गल्ती यानागु स्वीकार याःगु दु । बादलपाखे संकेत यासें २०७० सालया संविधानसभा चुनावय् थःत बम क्ययेकुगु द्वपं प्रचण्डं ब्यूगु दु ।

प्रचण्डं बादलयात गृहमन्त्री दयेकाः गल्ती यानागु धयाच्वंगु इलय् ब्ययेक्वःगु ढंगं जनार्दन शर्मा प्रभाकरयात मन्त्री मदयेकूसे गल्ती यानागु सन्देश प्रवाह याःगु खः ।

थःत मछिंगु अवस्थाय् साथ बिइपिं प्रतिसिबें पार्टी कुचा याइपिं व थःत हे आक्रमण याइपिन्त मन्त्री दयेकाः गल्ती यानागु धाःगु दु । प्रचण्डं धाःगु दु, जिं रुकुमेली जनता न्ह्यःने आत्मालोचना यायेत नं वयागु खः ।

कम्युनिष्ट पार्टीया निगू तिहाईया सरकार जूबलय् गृहमन्त्रीइ बादललिसें जनार्दन शर्मा प्रभाकरया नं चर्चा जूगु खः । माओवादी कोटाय् बादलं गृहमन्त्री जुयाः बाजी मारेयात । प्रभाकर मन्त्री तकं जुइमखन । प्रचण्डं बादलयात हे गृहमन्त्री दयेकूबलय् प्रभाकर असन्तुष्ट जूगु खः । उगु इलय् प्रभाकरयात दयेकेत्यंगु तर प्रचण्ड लिपांगु इलय् परिवर्तित जूगु खः । तर, कठिन इलय् प्रभाकरं प्रचण्डया साथ मत्वःतल । उकिं प्रभाकरया गृहजिल्ला रुकुम थ्यंकाः प्रचण्डं आत्मालोचना याःगु खः ।

अथेहे, प्रचण्डं बादलयात कडा बोली न्वःवायेगु यानाहःगु दु । वयात बम क्ययेकूगु द्वपं तकं ब्यूगु दु । बादलं नं प्रचण्डयात ज्याउलाख्यःया चिडियाखानाय् यंकाः कुनेगु धम्की बिइधुंकूगु दु । छगू इलय् नापं जनयुद्ध ल्वाःपिं प्रचण्ड व बादल दथुइ विगतय् नं द्वन्द्वात्मक स्वापू दूगु खः । बादलयात जनयुद्धकालय् हे सांस्कृतिक विचलनया द्वपं ब्यूगु खः । माओवादी केन्द्रया नेता देव गुरुंगं बादलयाके सांस्कृतिक विचलन जनयुद्धकालय् हे दूगु धाःगु दु ।

बादल प्रचण्डपाखें ब्यागलं च्वनाः निक्वःगु संविधानसभा चुनावय् मेगु पार्टी चायेकूगु पुचलय् वन । चुनाव बहिष्कारय् तकं सहभागी जुल । न्हापाया संसदीय चुनावय् माओवादीइ लिहाँ वल । बादल चुनाव मल्वात । राष्ट्रिय सभाया सांसद जुयाः गृहमन्त्री जुइत ताःलात । तर, माओवादीया कोटाय् मन्त्री जूम्ह बादल प्रधानमन्त्री केपी शर्मा ओली नेतृत्वया पुचलय् वन । आः बादल नेकपा एमालेया ३ नम्बर प्रदेश कमिटीया इञ्चार्ज जूगु दु ।

Categorized in राजनीति