nepal investment baink

राहतया नामय् नाटक

विजयकृष्ण  श्रेष्ठ

तःभुखाय् लिपाया तत्कालया उद्धारया ज्याय् ला सेना, प्रहरी, सशस्त्र प्रहरी व विदेशी उद्धारकर्ता सेना हे लगे जुल । थुकी गुलिखे थासय् स्थानीयतसें नं ग्वाहालि यात । थुगु इलय् संचार, विद्युत्या क्षेत्रयापिं सक्रिय जूगु नं न्ह्यथनेबहःजू । 

तर भुखाय् ब्वःगु छुं ई लिपा स्थिति सामान्यीकरण जुयाच्वंगु इलय् हे नेपालय् राहतया नामय् अनेक व्यक्ति, संघसंस्था व समूहत सक्रिय जुल । अले हानं धिसिमिसि धाःपिं राजनीतिक दल नं पिहाँ वल । देसय् तत्वःगु संकट जूगु इलय् सकलें छप्पँ जुइमाः धकाः पिहां वयाः संगु ला पाय्छि हे जू तर ज्या यायेगु सिकं ज्या याना धकाः ब्वयेगु ज्या जूबलय् थ्व चहःपहः हे हिसि मदयावंगु दु । अले सकलें छप्पँ जुइमाः धइगु खँ नं भावनासिकं अर्ती उपदेश व ब्वयेगु ज्या अप्वः जूगु दु । म्हुतुसिसिकं वा छ्वां वःगु खँ जूवंगु दु ।

धिसिमिसे धाःपिं पार्टीत आः नं सक्रिय जुयाच्वंगु दु, मनू नं खाकाच्वंगु दु, तर लिच्वःया दृष्टिकोणं स्वयेगु खःसा छुं खास तःधंगु उपलब्धि जूगु मदु । वसिकं नं थीथी सामाजिक सञ्जालय् व पत्रपत्रिकालिसेंया सञ्चार माध्यमय् फोटो ब्वयाः डंका पिटे यायेगु ज्या धाःसा जुयाच्वंगु दु । 

थ्व स्थिति नेपालय् वास्तविक रुपं नवनिर्माण यायेगु ज्याया हालत व स्थिति गथे जुइ धइगु खँ अःपुक हे थुइका सीका कायेफु । 

संसारय् स्वयंसेवापाखें नं ततःधंगु ज्या जुयाच्वंगु दु व जुया हे वयाच्वंगु दु । मनूतय्गु सामूहिक संकल्प व शक्तिं अकल्पनीय व असम्भव ज्या नं सम्भव जूगु दु । तर झीथाय् थ्व इलय् थ्व ज्या ब्वसा जक जूगु तसकं हे दुःखया खँ खः । 

जूगु ला छुं हे मदु धकाः धइगु मखु । थथे जूबलय् राहत थ्यन न सतक थ्यंथाय्तक, ज्या जुलं नं सकसिनं खनीथाय् जक नं जूवंगु दु । थुकिं वास्तविक रुपं पीडितपिनि घालय् गुलि मल्हम तयेफत थ्व स्वयेमाःगु दु ।