nepal investment baink

राष्ट्रिय पत्रकार दबूपाखें खुम्ह मिसा पत्रकारपिन्त हन

नेवा: अनलाइन न्युज – विजयरत्न | ने.सं. ११४४ चिल्लागा पारु (२०८० चैत्र १३ गते) मंगलवाः

नेवाः पत्रकार राष्ट्रिय दबू पाखें ११४ क्वःगु अन्तर्राष्ट्रिय श्रमिक मिसा दिवसया लसताय् सोमवाः खुम्ह मिसा पत्रकारपिन्त ‘साधना पत्रकारिता सम्मान’पाखे हनेज्या याःगु दु ।

११४ क्वःगु अन्तर्राष्ट्रिय मिसा दिवसया लसताय् पत्रकारिता ख्यलय् मदिक्क योगदान यानाः वयाच्वनादीपिं खुम्ह मिसा पत्रकारपिन्त साधना पत्रकारिता हना ११४४ सम्मान लःल्हाःगु खः ।

नेपाल सरकारया उपप्रधान लिसें स्वास्थ्य एवं जनसंख्यामन्त्री उपेन्द्र यादवया मूपाहाँसुइ न्ह्याःगु उगु ज्याझ्वलय् नेवाः पत्रकार राष्ट्रिय दबूया ख्वाःपौ ‘आज्जु’ स्वला पौ या नं चिखिफ्यने ज्या जूगु  खः ।

नेवाः पत्रकार राष्ट्रिय दबू केन्द्रया ल्यू छ्यान्जे सुनिता महर्जनया कजिसुइ जूगु उगु ज्याझ्वः नेवाः पत्रकार राष्ट्रिय दबूया नायः नृपेन्द्रलाल श्रेष्ठया सभानायःसुइ जूगु खः ।

मूपाहा उपप्रधान लिसे स्वास्थ्य नाप जनसंख्यामन्त्री उपेन्द्र यादवं खुम्ह मिसा पत्रकारपिं पत्रकारिता ख्यलय् योगदान यानाच्वपिन्त हनागु खः धकाः ज्याझ्वःया कजि पत्रकार दबूया ल्यु छ्याञ्यजे सुनिता महर्जनं लसकुस नुगःखँ तयेगु झ्वलय् जानकारी बियादीगु खः ।

संचार ख्यलय् मदिक्क पलाः न्ह्याकाः वयाच्वपिं भगवति तिमल्सिना, पवन वर्षा शाह, रीता महर्जन, शान्ति तामाङ्ग, सुनी बनेपाली व यलु जोशीयात उगु ज्याझ्वलय् हंगु खः ।

पत्रकार दबू न वंगु च्यादँनिसे अन्तर्राष्ट्रिय नारी दिवसया लसताय् मिसा पत्रकारपिन्त थथे हनेज्या यानाः वयाच्वंगु खः।

दबूया नायः नृपेन्द्रलाल श्रेष्ठं २००८ सालय् महिला लय् पौया सम्पादक साधना प्रधानया नामय् साधना पत्रकारिता सम्मानपाखे मिसा पत्रकारपिन्त हनेज्या याना वयागु खः धकाः धयादीगु दु ।

दबूया न्वकु रचना श्रेष्ठं सुभाय् नुगःखँ तयादीगु उगु ज्याझ्वलय् दबूया  निवर्तमान नायः सुरजबीर बज्राचार्य, कानूनी सल्लाहकार किरण शाक्य , केन्द्रिय सल्लाहकार विजयरत्न असंबरे, दबू यल कचाया नायः मन्जु बज्राचार्य, आदिवासी जनजाति पत्रकार महासंघया न्वकू अमरध्वज लामा व दबूया वरिष्ठ न्वकू सुनिल बज्राचार्य पिन्सं नं नुगःखँ तयादीगु खः ।

Categorized in राष्ट्रिय