zero media family planning adv

राष्ट्रिय टेबलटेनिस कासामि अनिता महर्जनं चायेकल एन्निज पिंगपंग क्लब

नेवा: अनलाइन न्युज – ललेन्द्र शाक्य | २०७७ चैत्र २५, बुधबार ११:२२:२४

राष्ट्रिय टेबलटेनिस कासामि अनिता महर्जनं वर्ल्ड टेबलटेनिस डेया लसताय् लाकाः मंगलवाः थः मांअबुया ल्हाःतं एन्निज पिंगपंग क्लब पलिस्था याःगु दु ।

क्लबय् टेबलटेनिस सयेके मंदुपिं न्ह्याम्ह न्ह्याग्गु उमेरया मनुखं ह्वःताः कायेखनी । थःगु हे छेँय् पलिस्था याःगु क्बल छुं ई न्ह्यःनिसें संचालनय् वःगु जूसां नं मंगलवाः अबु कान्छाकाजी महर्जन व मां बाँलाः मयजु महर्जनया ल्हाःतं उलेज्या याःगु खः ।

राष्ट्रया नितिं योगदान बिइगु आज्जुं क्लब पलिस्था यानागु कासामि अनिता महर्जनं धाःगु दु । येँया सामाखुसिया सरकारी धाराय् च्वंगु थःगु हे छेँय् क्लब चायेकूगु खः ।

अनिता महर्जन टेबलटेनिस म्हितावःगु १५ दँ दयेधुंकल । आः अनिता सशस्त्र प्रहरी बलय् आबद्ध जुयाच्वंगु दु । थःगु नितिं टेबलटेनिस जीवनया महत्वं जाःगु पक्ष जूगु अनिता महर्जनं धाःगु दु । वं धाःगु दु, थौं टेबलटेनिसं हे जितः थन तक थ्यंकूगु खः । जिं कयागु ज्ञान फुक्कसित इने चाहेजू ।

अनिता महर्जनं लकडाउनया इलय् कासामिपिन्त ग्वाहालि यानाः समाजसेवाय् नं सक्रियता क्यंगु खः । अमेरिकाय् च्वंगु क्यालिफोर्नियाया जिपिं नेपाःमि धैगु संस्थां नेशनल हिरो अवार्ड कोभिड १९ य् अनिता महर्जनयात मनोनयन तकं याःगु खः । अथेहे, नेपालय् हे नं कोभिड १९ नेशनल हिरो अवार्डय् नं मनोनित जूगु खः अनिता महर्जन ।

Categorized in कासा