nepal investment baink

राष्ट्रिय जनगगणना अन्तर्गत छेँजःया सूचीकरण यायेगु ज्याझ्वः न्ह्यात

नेवा: अनलाइन न्युज – ललेन्द्र शाक्य | २०७८ भाद्र ३०, बुधबार १०:५०:४६

थौं बुधवाःनिसें झिंनिक्वःगु (१२ क्वःगु) राष्ट्रिय राष्ट्रिय जनगणना न्ह्याःगु दु । जनगणनाया न्हापांगु चरण अन्तर्गत थौं बुधवाःनिसें छेँ व छेँजःया सूचीकरण यायेगु ज्याझ्वः न्ह्याःगु खः ।

भाद्र ३० निसें असोज १८ गतेतक सुपरिवेक्षकपिं छेँय् छेँय् थ्यंकाः छेँ व छेँजःया दुजःपिनिगु सूचीकरणया ज्या यायेगु केन्द्रीय तथ्यांक विभागया निर्देशक लिसें सुचं अधिकारी तीर्थ चौलागाई नं जानकारी ब्यूगु दु । सूचीकरणय् छेँजलय् च्वनाच्वंपिं दुजः मिसा, मिजं व यौीनक लिसें लैंगिक अल्पसंख्यकया ल्याःतक विवरण जायेकीगु जुइ ।

वंगु भाद्र २७ व २८ गतेस तालिम काःपिं ८ हजार ५ सय सुपरिवेक्षकपिन्त सूचीकरणय् खटेयाःगु दु । सूचीकरणया हे आधारय् मू गणना याइ ।

असोज १८ गतेलिपा गणक भर्ना यानाः कार्तिक १३ निसें १६ गतेतक तालिम बिइ । गणकपिनिगु तालिमलिपा मू जनगणना कार्तिक २५ निसें मंसीर ९ गतेतक जुइ । मू जनगणनाय् ३९ हजार गणकपिन्सं प्रत्येक छेँजः दुने वनाः मू न्ह्यसः न्यनेगु व विवरण जायेकेगु ज्या याइ ।

थ्वसिबें न्ह्यः १६ बैशाखय् सुपरिवेक्षक तालिम न्ह्याकीगु, २६ गतेनिसें छेँजः सूचीकरण याइगु, १७ जेठनिसें गणकपिन्त तालिम बिइगु, २५ जेठनिसें मू गणना ज्या न्ह्याकेगु कार्यतालिका दूगु खः । तर, कोरोना महामारीया हुनिं उगु कार्यतालिका कथंया ज्या स्थगित जूगु खः ।

थुगु दँया राष्ट्रिय जनगणनाया नारा ‘जिगु गणना जिगु सहभागिता’ तय याःगु दु ।

नेपालय् वि.सं. १९६८ स न्हापांगु राष्ट्रिय जनगणना जूगु खः । वधुंकाः हरेक झिदँ झिदँय् जनगणना जुयाः वयाच्वंगु दु । अय्सां, न्याक्वःगु राष्ट्रिय जनगणना निर्धारित तिथिसिबें ल्यूने क्वचाःगु खः ।

२००८ सालय् नियमित जनगणना जुइमाःगुलि २००७ सालया क्रान्ति व वधुंकाःया राजनीतिक घटनाक्रमया हुनिं २००९ निसें २०११ य् जनगणना याःगु खः ।

राष्ट्रिय जनगणना २०६८ कथं नेपाःया जनसंख्या २ करोड ६५ लाख दु । आः जनसंख्या थाहाँ वयाः ३ करोड ४६ लाख थ्यंगु तथ्यांक विभागया अनुमान दु ।

Categorized in राष्ट्रिय