city axpris 2

राष्ट्रपतिइ डा. बाबुराम भट्टराईयात यायेगु प्रचण्डया तयारी, कांग्रेसया नं समर्थन !

नेवा: अनलाइन न्युज – ललेन्द्र शाक्य | २०७९ माघ ८, आइतबार ११:२५:०४

प्रतिनिधिसभां सभामुख व उपसभामुख ल्ययेधुंकाः देय् आः राष्ट्रपति व उपराष्ट्रपतिया निर्वाचतपाखे न्ह्यःने वंगु दु । संसदया नेतृत्व सभामुख व उपसभामुख निगुलिं पद सत्ता गठबन्धनं ल्हातय् लाकूगु दु ।

सभामुखय् एमालेया उम्मेदवार देवराज घिमिरे निर्वाचित जुलसा उपसभामुखय् सास्वपापाखें इन्दिरा राना मगरं निर्वाचित जूगु दु । मुलुक आः राष्ट्रपतिया निर्वाचनय् दुहाँ वनेधुंकाः उम्मेदवार सु जुइगु धैगु चर्चा न्ह्याःगु दु ।

प्रधानमन्त्री पुष्पकमल दाहाल प्रचण्डं राष्ट्रपतिइ राष्ट्रिय सहमति मालेगु धाःगु दु । पुस २६ गते संसदय् विश्वासया मत काःबलय् प्रधानमन्त्री प्रचण्डयात नेपाली कांग्रेसं नं समर्थन याःगु खः । उगु समर्थनलिसें कांग्रेस नेतृत्व राष्ट्रपतिइ दाबी यायेगु तहलय् थ्यंगु दु ।

कांग्रेस नेतापिन्सं राष्ट्रपतिइ थःपिन्सं न्ह्यःने हःम्ह उम्मेदवारं हे त्याकीगु सार्वजनिक अभिव्यक्ति बियाहःगु दु । प्रधानमन्त्रीप प्रचण्डं राष्ट्रपतिइ राष्ट्रिय सहमति मालेगु धकाः अभिव्यक्ति बिइधुंकाः सत्ता गठबन्धनया मू घटक नेकपा एमालेया नायः केपी शर्मा ओली थारान्हूगु दु । ओलीं राष्ट्रपतिबारे सत्ता गठबन्धनय् सहमति जुयाः एमालेया भागय् लाःगु दाबी याःगु दु ।

राष्ट्रपतिइ सहमति जूसा आः एमालें न्ह्यःने हइम्ह उम्मेदवारय् सहमति जुइमाःगु धयाहःगु दु । तर, प्रधानमन्त्री प्रचण्डं धाःसा शक्ति सन्तुलन मिलेयायेगु नितिं नं एमाले बाहेकया सर्वस्वीकार्य व्यक्तित्वया मालेमाःगु धासें सहलह ब्याकूगु दु ।

माओवादी लिक्क लाःगु उच्च स्रोतया कथं प्रधानमन्त्री प्रचण्डं कांग्रेस व मधेशवादी दलं स्वीकार यायेफइगु धासें नेपाल समाजवादी पार्टीया नायः लिसें पूर्व प्रधानमन्त्री डा. बाबुराम भट्टराईयात राष्टपतिया नितिं न्ह्यःने हयेत्यंगु दु । डा. भट्टराई संसदया सक्रिय राजनीतिपाखें आः तापाक्क च्वनाच्वंगु दु । बाबुरामया हे जोडबलय् प्रचण्ड गोरखा २ पाखें उम्मेदवार जुयाः त्याकूगु खः ।

कांग्रेस सभापति शेरबहादुर देउवां नं डा. बाबुराम भट्टराईया नामय् राष्ट्रपतिया निर्वाचनय् सहमति प्वंकेफइगु सिग्नल ब्यूगु दु । देउवा नं एमालेया म्हिचाय् राष्ट्रपति पद मवनेमा धैगु पक्षय् दु । बरु, पूर्व माओवादी नेता बाबुरामयात हे राष्ट्रपतिइ स्वीकार यायेफइगु देउवाया धापू दु ।

निर्वाचनतकया कांग्रेस नेतृत्वया गठबन्धन कायम हे जूगु जूसा कांग्रेसया बरिष्ठ नेता रामचन्द्र पौडेल राष्ट्रपतिया स्वभाविक उम्मेदवार जुइगु खः । तर, आः निर्वाचनया गठबन्धन क्वःदले धुंकूगु दु ।

कांग्रेसय् राष्ट्रपतिया उम्मेदवार बारे सहलह जूगु दु । आः मंकाः उम्मेदवारया रुपं स्वीकार यायेफुम्ह व्यक्तिया विषयस सहलह जूगु दु । आः लोसपाया नायः महन्थ ठाकुरया नं नां राष्ट्रपतिया नितिं चर्चाय् दु । ठाकुरया नामय् सहमति मजूसा पूर्व महामन्त्री कृष्णप्रसाद सिटौलाया नामय् नं सहहल जूगु स्रोतया दाबी दु ।

Categorized in राजनीति