Mohanai 2078 KTM

रामदेवी मानन्धरया च्वसां व सलं बुद्ध भजन म्ये पिदनीगु

नेवा: अनलाइन न्युज – ललेन्द्र शाक्य | २०७८ आश्विन २१, बिहिबार १५:००:५०

‘भक्तया मनय् ज्ञान ब्यूम्ह...’ बोलया बुद्ध भजन म्ये च्वयाः व उगु म्येय् सः बियाः रामदेवी मानन्धर पिलू वयेत्यंगु दु ।

थुगु बुद्ध भजन म्येया लय् चिनामि संगीतकःमि मोहनदेवी महर्जन खः ।

जीवित जल्मीया संगीत संयोजन दुथ्याःगु थुगु म्येया म्यूजिक भिडियो निर्माण ज्या क्वचाःगु दु । थुगु म्येया म्यूजिक भिडियोय् बरिष्ठ निर्देशक कलाकार च्वमि पवन जोशीं निर्देशन यानादीगु दुसा छायांकन व सम्पादनया भाला राजेश शाक्यं कुबियादीगु दु ।

‘भक्तया मनय् ज्ञान ब्यूम्ह...’ बुद्ध भजन म्यूजिक भिडियो दुने आपालं न्हूप्रतिभा कलाकारपिनिगु अभिनय दुथ्याःगु जानकारी निर्देशक पवन जोशीं बियादीगु दुसा वर्तमान अवस्थाया विसंगतियात परिणाममुखी सन्देशमूलक प्रस्तुतिइ छरपष्ट क्यनेगु कुतः थुगु म्यूजिक भिडियो दुने निर्देशक जोशीं दुथ्याकादीगु दु धकाः म्येच्वमि व हालामि रामदेवी मानन्धरं लसता पिज्वयेकाः नुगःखँ प्वंकादीगु दु ।

मोहनी नखःया लसताय् लाकाः थुगु म्यूजिक भिडियो आः छुं दिं दुने हे हाइलाइट्स नेवाः यूट्युब च्यानलपाखें सार्वजनिक यायेगु जानकारी नं म्येच्वमि व हालामि रामदेवी मानन्धरं बियादीगु दु ।

ज्याया बोझं विरक्त जुयाच्वंपिं जनमानसदथुइ आनन्दं सासः ल्हाकाः त्यानुचाः तंकेगु ज्या संगीतं याःगु महसुस फुक्कस्यां यात, बास्तवय् दुःख जक मानवीय मखु, फुक्क मानवं शान्तिया आभाष कायेदये खनेमा व थ्वहे बुद्ध ज्ञान खः, सतकर्म यायेगु हे बुद्ध धम खः धकाः म्येच्वमि व हालामि रामदेवी मानन्धरं धयादीगु दु ।

Categorized in कला