city axpris 2

राप्रपां उपराष्ट्रपति निर्वाचनय् ब्वति मकाइगु

नेवा: अनलाइन न्युज – ललेन्द्र शाक्य | २०७९ चैत्र ३, शुक्रबार १०:३०:०४

राष्ट्रिय प्रजातन्त्र पार्टी (राप्रपां) उपराष्ट्रपति निर्वाचनय् मतदान मयाइगु जूगु दु ।

थ्वसिबें न्ह्यः फागुन २५ गते जूगु राष्ट्रपति निर्वाचनय् नं राप्रपां मतदान मयाःगु खः ।

वंगु बुधवाः च्वंगु पार्टीया केन्द्रीय कार्यसम्पादन समितिया मुँज्यां राष्ट्रपति निर्वाचनय् थें हे उपराष्ट्रपति निर्वाचनय् नं ब्वति मकायेगु निर्णय याःगु राप्रपाया प्रवक्ता मोहन श्रेष्ठं जानकारी ब्यूगु दु । राप्रपाया १४ म्ह संघीय सांसद व २८ म्ह प्रदेशसभा दुजः मतदाता दु ।

थौं शुक्रवाः सुथय् १० ता ईनिसें न्हिनय् ३ ता ईतक संघीय संसद भवनय् उपराष्ट्रपति पदया नितिं निर्वाचन जुइ ।

निर्वाचनय् नेकपा एमालेया अष्टलक्ष्मी शाक्य बोहरा, सत्ता गठबन्धनपाखें जसपाया रामसहाय प्रसाद यादव, जसपाया हे प्रमिला कुमारी यादव व जनमत पार्टीया ममता झा यानाः प्यम्ह उपराष्ट्रपति उम्मेदवार दु ।

जसपाया प्रमिलां थःगु उम्मेदवारी निष्कृय जूगु धाःगु दु । तर उम्मेदवारी लितकायेगु ईसिबें लिपा जक उम्मेदवारी निष्कृय जूगु धाःगुलिं मतपत्रय् प्रमिलाया किपाः व नां दुथ्यानाच्वंगु दु ।

Categorized in राजनीति