zero media family planning adv

रात्रिकालीन व्यवसाय व रेष्टुरेन्ट बहनी ९ ता ईलिपा बन्द यायेत इनाप

नेवा: अनलाइन न्युज – ललेन्द्र शाक्य | २०७७ चैत्र २६, बिहिबार १२:१२:१५

सरकारं रात्रिकालीन व्यवसाय व रेष्टुरेन्टत बहनी ९ ता ईलिपा बन्द यायेत इनाप याःगु दु ।

कोरोना संक्रमण नियन्त्रणया नितिं जनस्वास्थ्य मापदण्डया उल्लंघन व कोरोनाया बेलायत भेरियन्टया अप्वःगु दरयात ध्यानय् तयाः स्वास्थ्य व जनसंख्या मन्त्रालयं रात्रिकालीन व्यवसाय कडाइया लिसें बन्द याकेत इनाप याःगु खः ।

मन्त्रालयया सह प्रवक्ता डा. समीरकुमार अधिकारीं बुधवाः सुचं सार्वजनिक यासें संक्रामक रोग ऐन कथं कारवाही यायेगु कथं छेँ पिने व सार्वजनि थासय् मास्कया छ्यलाबुलायात अनिवार्य याकेत नं फुक्क जिल्ला प्रशासन ज्याकुथियात इनाप याःगु दु ।

अथेहे, कोरोना संक्रमितया पहिचान यायेत कन्ट्याक्ट ट्रेसिंग अप्वयेकेत व केस इन्भेस्टिगेसनया नितिं एन्टीजेन व माःकथं पीसीआर परीक्षण अप्वयेकेत नं मन्त्रालयं सम्बन्धित स्वास्थ्य ज्याकुथि व स्थानीय तहयात इनाप याःगु दु ।

अथेहे, तःधंगु सहरय् ५०० म्हसिबें अप्वः व चीधंगु सहरय् १० म्ह सिबें अप्वः सक्रिय संक्रमित खनेदःसा उगु थासय् वयेवनेगुलि कडाइ यायेत नं मन्त्रालयं सम्बन्धित निकाययात आग्रह याःगु दु ।
विदेशं वइगु थीथी पुचः व भ्रमण दलया दुजःपिनिगु ल्याः व क्वारेन्टिनया नियमय् नं कडाइ यायेत मन्त्रालयं इनाप याःगु दु ।

मन्त्रालयं येँ, पोखरा लिसेंया तःधंगु सहरय् विद्यालय वनीपिं उमेर पुचलय् नं कोरोना संक्रमण अप्वयाः वयाच्वंगुलिं शैक्षिक संस्थाय् नं उच्च सतर्कता छ्यलेत आग्रह याःगु दु ।

अथेहे, अप्वः भीडभाड जुइगु थाय् सपिंग मल, सिनेमा हल, नाचघर, हेल्थ क्लब, स्वीमिंग पुल, पार्टी प्यालेस, देगः लिसेंया क्षेत्रय् उच्च स्वास्थ्य सुरक्षा सावधानी छ्यलेत नं इनाप याःगु दु ।

Categorized in बजाः