ad prabhu

राजमतीया हिरो नं दयेकुगु म्यूजिक भिडियो झिदँ लिपा पिदन (भिडियो)

नेवा: अनलाइन न्युज – विजयरत्न | २०७७ मङ्सिर ५, शुक्रबार १३:०२:५३

ऐतिहासिक नेवाः संकिपा ...राजमति...इ तुइसिं जुया म्हितादीम्ह हिरो मणिराज लवटया निर्देशनय् दयेकुगु “कःसिइ च्वंगु गमलाय् गोदावरी स्वां” म्येया म्यूजिक भिडियो नकतिनि जक पिहाँ वःगु दु ।

कलाकार मणिराज लवटया निर्देशनय् तयार जुउगु थ्व म्येया म्यूजिक भिडियो थौंसिबें झिदँ न्ह्यः हे तयार जूगु खःसां आः वया तिनि सार्वजनिक याःगु खः । झिदँ न्ह्यः थःम्हं सःथें मसःथें निर्देशन यानागु उगु म्युजिक भिडियो अबायति हे तयार जूगु खः । तर भतिचा वमगाः थ्वमगाःथें च्वना अबायति रिलिज मयानागु खँ कलाकार व थ्व म्यूजिक भिडियोया निर्देशक मणिराज लवटं कनादिल ।

मणिराज लवट थःनापं थः जहान हिसिला महर्जनया मेन रोल दूगु थ्व म्येया म्यूजिक भिडियोस इमि म्ह्याय् पालिजा लवटं नं म्हितातःगु दुसा अबायति पालिजा स्वदँ हे मदुनिगु खँ वयकःपिन्सं कनादिल ।

उगु इलय् दयेके धुंकाः थःम्हं दयेकाःगु भिडियो पितब्वय् मछाःगु खँ कनादीम्ह मणिराज लवटं आः वया म्यूजिक स्वयाबले मेमेगु नेवाः म्यूजिक भिडियोथें हे थःगु म्यूजिक भिडियो नं उत्तिग्यंथें च्वंगुलिं सार्वजनिक यायेत मणिराज लवटयात जहान हिसिला महर्जनं ग्वाकुगु खँ नं निर्देशक एवं कलाकार मणिराज लवटं न्ह्यथनादिल ।

“कःसिइ च्वंगु गमलाय् गोदावरी स्वां” बोलया थ्व म्ये न्हापा म्येहालामि एन्जेला श्रेष्ठं हालातःगु खःसा थुगु म्यूजिक भिडियोया निंतिं धाःसा रत्नशोभा महर्जनं हालादीगु खः ।

जनकवि दुर्गालाल श्रेष्ठं च्वयादीगु खःसा न्ह्यू बज्राचार्यं लय् चिनादीगु थ्व म्यूजिक भिडियो म्येहालामि रत्नशोभा महर्जनया हे युट्युब च्यानलपाखें सार्वजनिक याःगु खः ।

थ्व म्यूजिक भिडियोया किपालुमि व सम्पादक सुमन महर्जन खःसा थुके मणिराज लवट, हिसिला महर्जन व पालिजा लवटया नापनापं नानीछोरी महर्जन, राजमाया महर्जन, प्रमिला महर्जन, प्रेमकुमारी महर्जन लगायत आपालं मचा कलाकारपिनिगु नं ब्वति दूगु खः ।

(थन क्लीक यानाः म्यूजिक भिडियो स्वयादिसँ)

Categorized in कला