zero media family planning adv

राजमति कुमतिया फिमेल भर्सनया स्वकुमि ल्याः छगू लख पुल

नेवा: अनलाइन न्युज – विजयरत्न | २०७७ फाल्गुण ५, बुधबार १२:२९:२०

राजमति कुमति जिके वःसा पिरति धाःगु म्ये छपु लोकलसय् आधारित म्ये खःसा थ्व तसकं लोकंह्वाःगु म्ये नं खः ।

थ्वहे म्येया लिधंसाय् “राजमति” नांयागु नेवाः संकिपा नं पिंदगु दु । उलिजक मखसे राणा प्रधानमन्त्री जंगबहादुर राणा बेलायत वंबले अन नेपाःया राष्ट्रिय धुन धकाः थ्वहे म्येया धुन हायेकुगु ऐतिहासिक प्रमाण दु । थथे ऐतिहासिक मान्यता दूगु थ्व म्ये आःतक मिजंम्ह हालातःगु म्ये अर्थात छम्ह मिजं नं थःगु मतिनाया बाखं न्ह्यब्वयातःगु म्ये कथं न्यनाः वया च्वंगु खःसा आः वया थुकिया फिमेल भर्सन अथे धइगु छम्ह मिसां नं थ्वहे लसय् थःगु मतिनाया बाखं न्ह्यब्वयातःगु म्ये नं पिहाँ वःगु दु ।

म्येहालामि अगिना तण्डुकार शाहीं हालातःगु थ्व म्ये च्वयादीम्ह नेपाःया पुलाँम्ह नाट्यकःमि, संकिपामि पवन जोशी खः । पवन जोशी थौंकन्हे नेवाः म्युजिक भिडियो ख्यलय् तसकं सकृय जुयाच्वंम्ह निर्देशक खःसा वयकया हे निर्देशनय् थ्व राजमति कुमतिया मिसा संस्करणया नं म्युजिक भिडियो पिहाँ वःगु दु । सन् २०२० अक्टोबर २९ खुन्हु हाईलाइट्स नेपालया युट्युबय् तःगु थ्व म्ये प्यला दुने पिहाँ वःगु मेमेगु नेवाः म्युजिक भिडियोयात यक्वःहे लिउने लाकेत ताःलागु दु ।

थ्व प्यलाया दुने छगू लख व निद्वःसिबें अप्वः स्वकुमिपिन्सं स्वया छगू न्हूगु रेकर्ड तयेत ताःलाःगु दु ।

थ्व स्वला प्यला दुने पिदंगु आपालं नेवाः म्युजिक भिडियो प्राविधिक रुपं यक्वः बांलागु व आपालं खर्च याना नांजाःपिं कलाकारपिं तया दयेकातःगु दुसा थ्व राजमति कुमति फिमेल भर्सनय् धाःसा रोशन शाक्य व दृष्टि जोशी नांयापिं निम्ह न्हूपिं कलाकारया नापनापं म्येहालामि अगिना तण्डुकार शाही थःम्हं हे म्हितातःगु दु ।

थ्व म्ये थम्हं सामान्य खर्चं तयार यानागु खँ कनादीम्ह पवन जोशीं थःगु म्ये थुलि म्हो ईया दुने थथे छगू लखसिबें अप्वः स्वकुमिं स्वगुलिं सकसित सुभाय् देछानादीगु दुसा म्येया प्रस्तुनि बाँलात धाःसा सामान्य खर्च जूसां कलाकार न्हूपिं जूसां स्वकुमिया नुगः त्याकेफइगु जुयाच्वन धकाः कलाकःमि जोशीं लसता प्वंकादिल ।

Categorized in कला