kmc bidya

रहस्यं जाःगु मृत्यु प्रकरण : सीपिनिगु ल्याः ११ म्ह थ्यन

नेवा: अनलाइन न्युज – ललेन्द्र शाक्य | २०७७ बैशाख २०, शनिबार १७:२८:०६

महोत्तरीया भंगाहा व बर्दिबास नगरपालिका स्वाःगु बस्तीइ अज्ञात ल्वचं सीपिनिगु ल्याः ११ म्ह थ्यंगु दु ।

थौं शनिवाः बर्दिबास १२ य् च्वंगु अप्पा भट्टाय् ज्या याइम्ह ५५ दँया भारतीय नागरिक मोतिलाल प्रजापति व भंगाहा ६ जमुनियाँया ४८ दँया पलत साहया मृत्यु जुइधुंकाः सीपिनिगु ल्याः ११ म्ह थ्यंगु जिल्ला प्रहरी ज्याकुथिं जानकारी ब्यूगु दु ।

बर्दिबास १२ मेघरोल व भंगाहा ७ मेघनाथ गोरहन्नाय् वंगु मंगलवाः थुखे शुक्रवाःतक ८ म्ह मनूत सीधुंकूगु दु ।

सीपिं बर्दिबास १२ या ४ म्ह, भंगाहा ७ या ६ म्ह व भंगाहा ६ या १ म्ह जूगु उगु ज्याकुथिं जानकारी ब्यूगु दु । उगु स्वंगुलिं वडाया बस्ती थःथवय् स्वानाच्वंगु बस्ती खः ।

भंगाहा नगरपालिकाया प्रमुख संजीवकुमार साह नं घरेलु मदिराया सेवनं उपिं स्थानीयपिनिगु ज्यान वंगु जुइफूगु प्रारम्भिक अनुमान याःगु धाःगु दु । बर्दिबास नगरपालिकाया प्रमुख विदुरकुमार कार्कीं सीगुया हुनि सीम्ह परीक्षण जाँचं सीदइगु जानकारी ब्यूगु दु ।

स्वास्थ्य सेवा विभाग, इपिडिमायोलोजी व रोग नियन्त्रण महाशाखां थौं शनिवाः डा. अमृत पोखरेल व विश्व स्वास्थ्य संगठनया डा. सुदिपा खड्का व जिल्ला स्वास्थ्य ज्याकुथि महोत्तरीया पुचः उगु बस्तीइ थ्यंकूगु दु ।

उगु पुचलं विरामीया लक्षणबारे वःगु जानकारी व मेमेगु पक्षपाखें तकं अनुसन्धान यानाच्वंगु डा. पोखरेलं ब्यूगु दु । सीपिं मध्ये सिकेन्द्र सिंह व सुकदेव सिताई महराया सीम्ह परीक्षण याःगु दु । परीक्षण रिपोटृ वयेधुंकाः सीगुया हुनि बारे यकिन जुइगु जिल्ला प्रहरी ज्याकुथिया प्रमुख व प्रहरी उपरीक्षक श्यामकृष्ण अधिकारीं धाःगु दु ।

अथेहे, जिल्ला प्रहरी ज्याकुथिं सीपिं मध्ये निम्हेसिगु कोभिड १९ संक्रमण खः वा मखु यकिन यायेत स्वाब संकलन यानाः पिसिआर परीक्षणया नितिं प्रयोगशाला छ्वयागु जानकारी ब्यूगु दु ।

प्रहरी उपरीक्षक अधिकारीं धाःगु दु, “सीपिनिगु आरडिटी जाँच धुंकाः रिपोर्ट नेगेटिभ वःगु दु । आः पिसिआर जाँचया व परीक्षण रिपोर्ट वयेधुंकाः छु खः सीदइ ।”

थारु, मुसहर, चमार, बातर (सर्दार) लिसेंया जनजाति व दलित समुदायया सघन बसोबास दूगु उगु बस्तीइ थुकथं रहस्यमय कथं मनूत सीगु खः । मेघनाथ गोरहन्नाय् छवाः न्ह्यः जक सीतापुर, औरही व जमुनियाँ प्रहरी चौकीया मंकाः गस्तीं १६ हजार लिटरसिबें अप्वः मदिरा दयेकीगु कच्चा पदार्थ व प्यंगू भट्टी नष्ट याःगु खः ।

Categorized in दुर्घटना-अपराध