1142 nhoo dan adv

रसुवा नाकां २२ गः विद्युतीय माइक्रोबस आयात

नेवा: अनलाइन न्युज – ललेन्द्र शाक्य | २०७८ कार्तिक ११, बिहिबार ११:३५:२८

नेपाःया उत्तरी नाका रसुवागढीपाखें विद्युतीय माइक्रोबस आयात याःगु दु । सहरी क्षेत्रयात केन्द्रीत यानाः व्यवसायीपाखेंआयात याःगु २२ गः माइक्रोबस बुधवाः सनिलतक नेपाः दुहाँ वःगु दु । माइक्रोबसया सिट क्षमता १२ सिट दु ।

चीनं न्हिथं सवारीसाधन आयात जुयाच्वंगु व मोहनीया जःखः दुहाँवःगु माइक्रोबसया भन्सार प्रक्रिया पूवंकाः गन्तव्यपाखे छ्वयेधुनागु रसुवा भन्सार ज्याकुथिया सुचं अधिकारी नरेन्द्रप्रसाद चौधरीं जानकारी ब्यूगु दु ।

मोहनी न्ह्यः हे १०० गः विद्युतीय कार आयात जूगु खःसा लिपांगु इलय् माइक्रोबस आयात जुइगु क्रम अप्वःगु भन्सार ज्याकुथि टिमुरं जानकारी ब्यूगु दु ।

सहरी क्षेत्र केन्द्रीत यानाः आयात याःगु माइक्रोबसया पांग्रा चीजाःगु हुनिं कच्ची सतकं येँय् हयेत अतिकं चुनौती जूगु सवारी चालकपिन्सं प्रतिक्रिया ब्यूगु दु । रसुवागढीनिसें गल्छीतकया आपालं सतकय् अप्वः गाःगी दूगुलिं चीग्वःगु व चीजाःगु सवारीसाधन सहज रुपं हयेत अप्वः सहजग जुइमाःगु धाःगु दु ।

मोहनी न्ह्यः आयात जूगु चीग्वःगु कथंया छुं सवारीसाधन धाःसा मालधनी लिसें वया प्रतिनिधि मथ्यंबलय् भन्सार हाताय् थन्केजुयाच्वंगु दु । विद्युतीय सवारीसाधनया आयातं प्रदूषणया न्यूनीकरण लिसें सहरी क्षेत्रया लकस (वातावरण)या स्वच्छता अप्वइगु व पेट्रोलियम पदार्थपाखें चलेजुइगु यात्रुबाहक साधन क्रमिक रुपं चिलाः वनीगु धाःगु दु ।

सवारीसाधनय् दइगु ब्याट्री छक्वः चार्ज यायेधुंकाः प्यघौतक गाइगु जूगुलिं विना आवाज सहरी क्षेत्रया यात्रा अतिकं सहज जुइगु जानकारी ब्यूगु दु ।

आर्थिक दँ २०७७÷०७८ या साउननिसें आःतक ९०० सिबें अप्वः चीग्वःगु व तःग्वःगु सवारीसाधन आयात जूगु भन्सार ज्याकुथिं जानकारी ब्यूगु दु । आयात जूगु सवारीसाधनपाखें नियमकथं भन्सार शुल्कबापत ६५ करोडसिबें अप्वः राजस्व तकं दाखिला जुइधुंकूगु भन्सार अधिकारीं जानकारी ब्यूगु दु ।

Categorized in बजाः