zero media family planning adv

यौन व अयलाः

नेवा: अनलाइन न्युज | २०७२ आश्विन १८, सोमबार १९:३३:५८

यौन जीवन न्ह्यइपुल धाःसा वया जीवन नं उकथं हे न्ह्यइपुइ अले यौन जीवन स्यन धाःसा वयात जीवनय् नं उकिया लिच्वः लाइगु विश्लेषण मनोविद््तसें याना वयाच्वंगु दु । थुज्वःगु अवस्थाय् यौन जीवन न्ह्यइपुकेगु लागि मनूतसें यौन स्वापू तये न्ह्यः अय्लाःथ्व“ आदि मादक पदार्थ अले थीथी कथंया ड्रग्सत त्वने ययेकु धइगु ख“ छगू अध्ययनं क्यंगु दु ।
 यूरोपया नच्चा ल्यासेल्याय्म्हत दथुइ नशालु पदार्थ त्वना थःपिनिगु यौन जीवन सुथां लाकेफइ धइगु धारणा दुगु छगू लिच्वः पिहांवःगु दु । थुज्वःगु धारणा दयेकूपिं यूरोपियनत मध्ये दकलय् न्ह्यःने बेलायती खनेदुगु दु । थुकथं नशालु पदार्थ त्वनाः यौन स्वापू तयेगु प्रवृत्तिइ म्होचा उमेरयापिं आपा सक्रिय जूगु खनेदु । झिंखुद“ निसें ३५ द“या स्वब्वय् छब्व मिजंत अले २३ प्रतिशत मिसातसें थःगु यौनसम्बन्धय् न्हूगु ह्यूपाः हयेगु लागि थःपिन्सं नशालु पदार्थ त्वनेगु यानागु धाःगु दु । बीएमसी पब्लिक हेल्थं बेलायत लिसेंया गुंगू देय्या १३४१ म्ह ल्याय्म्हल्यासेतय् दथुइ छगू अध्ययन यानाः थुगु लिच्वः पिथंगु खः । थुगु अध्ययनया लिच्वः कथं यौनया विषयलय् सक्रिय जुयाच्वंपिं अय्लाः व ड्रग्स त्वनेगु यानाच्वंगुलिं उमिगु यौन जीवन अस्वस्थ व असुरक्षित जुयाच्वंगु क्यंगु दु ।
अध्ययनकर्तातसें अय्लाः व ड्रग्स त्वनाः यौन स्वापू तयाच्वंपिनिगु यौन ब्यवहार तसकं जोखिमपूर्ण अवस्थाय् लानाच्वंगु नं न्ह्यथंगु दु । थुगु अध्ययनं आपालं ल्याय्म्हल्यासेतसें यौन जीवन सुथां लाकेगु धकाः योजनावद्ध ढंगं अय्लाः त्वनेगु वा ड्रग्स कायेगु यानाच्वंगु क्यंगु दु । उमिसं यूरोपया गुंगू देय्या गुंगू मूमू शहरय् थुकथंया अध्यय याःगु खः । बेलायत, जर्मनी, अष्ट्रिया, चेक गणतन्त्र, ग्रिस, इटाली, पोर्चुगल, स्पेन व स्लोभानियाय् च्वनाः लगातार अय्लाः त्वनिगु भट्टि, बार व नाइटक्लबय् वनिपिं ल्याय्म्हल्यासेपिन्के छुं छुं न्ह्यसः न्यनाः उमिसं ब्यूगु लिसःया लिधंसाय् थुकथंया लिच्वः पिथंगु खः । थुगु अध्ययनं छु क्यंगु दु धाःसा १६ द“ थ्यने न्ह्यः हे अय्लाः त्वनेगु, ड्रग्स कायेगु यायेधुंकूगु खःसा उमिसं म्होचा उमेरय् हे यौन स्वापू नं तयेधुंकी, विशेष यानाः मिसात थुकी आपा न्ह्यःने लाःगु खनेदु ।


अष्ट्रियाया भियनाय् बच्छिथें मनूतसें अय्लाः त्वनेगु व यौन स्वापू तयेगु ज्या १६ द“ स्वयाः क्वय् हे याःगु खनेदु धाःसा थुकथंया ब्यवहार इटालिया भेनिसय् ३६ प्रतिशत, स्पेनया पाल्माया ३७ प्रतिशत व लिभरपुलय् ३० प्रतिशत ल्याय्म्हल्यासेतय्गु खनेदु । थुगु अध्ययनं प्यब्वय् छब्व ल्याय्म्हल्यासेतसें यौन स्वापू तयेगु लागि लागू पदार्थया रुपय् कोकिन कयाच्वंगु क्यंंगु दु धाःसा आपासिनं छम्ह स्वयाः आपालिसे स्वापू तयेत थुकथंया लागू पदार्थ त्वनेगु याःगु क्यंगु दु ।


अय्लाः त्वनेगु व ड्रग्स कायेगु ल्याय्म्हल्यासेतय्गु ब्यवहारं उमिगु जोखिम मोले यायेगु बानी अप्वयाच्वंगु क्यंगु दु धाःसा उमिसं यौन स्वापू तयाः थःपिं ‘तःमि’ जुयागु नं तायेकेगु यानाच्वंगु दु । थुगु अध्ययनं वंगु प्यवाः न्ह्यःनिसें लगातार अय्लाः त्वनाच्वंपिं मध्ये आपासिनं न्याम्ह वा व स्वया आपा मनूतलिसें यौन स्वापू तःगु क्यंगु दु धाःसा उमिसं उज्वःगु अवस्थाय् कण्डम तकं छ्यलेगु मयागु क्यंगु दु । थुगु अध्ययनय् यानाच्वंम्ह नापं सेन्टर फर पब्लिक हेल्थ लिभरपुल लागाया प्रमुख प्रोफेसर मार्क बेलिजं लखौं युरोपियन ल्याय्म्हल्यासेत थौंकन्हय् ड्रग्स व अय्लाःया कुलतय् लगेजुयाच्वंगु अले उमिसं यौन सम्बन्धी गलत निर्णय यायेगु यानाच्वंगु धाःगु दु । थुकिं यानाः उमिसं जोखिमपूर्ण यौन ब्यवहार यानाच्वंगु जुया उमित भविश्यय् समस्या वयेफुगु बेलिजया धापू दु । थुकथंया जोखिम न्यूनिकरण यायेगुया लिसें सुरक्षित यौन ब्यवहारया लागि विशेष कुतः जुइमाःगु ख“य् बेलिजं बः ब्यूगु दु । अय्लाः, ड्रग्स व असुरक्षित यौन ब्यवहारपाखें बचे यायेगु लागि यौन व ब्यवहारिक शिक्षा बिइमाः धइगु विज्ञतय् धापू दु ।