newayatataad 2

योजना आयोगया पुलांम्ह न्वकू कोरोना संक्रमित डा. रविन्द्रकुमार शाक्य मन्त

नेवा: अनलाइन न्युज – ललेन्द्र शाक्य | २०७७ मङ्सिर ११, बिहिबार १४:००:४०

कोरोना भाइरसपाखें संक्रमित राष्ट्रिय योजना आयोगया पुलांम्ह न्वकू (पूर्वउपाध्यक्ष) डा. रविन्द्रकुमार शाक्य आकाझाकां मन्त ।

डा. शाक्य नेपाल मेडिसिटी अस्पतालय् वासः यायेगु झ्वलय् थौं बिहिवाः सुथय् ४ ता इलय् मदुगु खः ।

डा. शाक्य २०७० सालपाखे योजना आयोगया न्वकू जुयादीगु खः । वय्कः दि शाक्य फाउण्डेशन नेपालया संस्थापक नं खः ।

डा. रविन्द्रकुमार शाक्य ७६ दँया उमेरय् मदुगु खः ।

डा. शाक्य तत्कालीन मन्त्रिपरिषदया नायः खिलराज रेग्मीया पालय् आयोगया न्वकू जुयादीगु खः । वय्कः तत्कालीन अर्थमन्त्री डा. रामशरण महतया पालय् अर्थमन्त्रालयया प्रमुख आर्थिक सल्लाहकार जुयादीगु खः ।

डा. शाक्य विज्ञान व वातावरण मन्त्रालयया सचिव नं जुयादी धुंकलसा वय्कलं योजना आयोगपाखें शाखा अधिकृतया रुपं करिअर सुरु याःगु खः ।

डा. शाक्यं अमेरिकापाखें अर्थशास्त्रय् स्नातकोत्तर व भारतया मुम्बई विश्वविद्यालयपाखें विद्यावारिधि यानादीगु खः ।

थौं बिहिवाः मदुम्ह डा. रविन्द्रकुमार शाक्ययप्रति श्रद्धाञ्जलि प्वंकूसें तत्कालीन मन्त्रिपरिषदया नायः रेग्मीं शाक्ययात छम्ह इमान्दार, कर्तव्यनिष्ठ, आर्थिक क्षेत्रया विज्ञया रुपं लुमंकूगु दु ।

वंगु कार्तिक २० गते डा. शाक्य कोरोना संक्रमण पुष्टि जुइधुंकाः २५ गते ग्लोबल अस्पतालय् भर्ना जुयादीगु खः ।

अन स्वास्थ्य अवस्था स्यनेधुंकाः थप वासः यायेगु नितिं शाक्ययात मंसीर ९ गते मेडिसिटी अस्पतालय् भर्ना याःगु खः ।

मधुमेह व उच्च रक्तचापया विरामी डा. शाक्ययात लिपांगु इलय् जलास्यँया नं समस्या खनेदूगु छेँजः स्रोतं जानकारी ब्यूगु दु ।

येँया वतु त्वाःया बासिन्दा डा. शाक्यया जहानलिसें स्वम्ह काय् व छम्ह म्ह्याय् दी ।

Categorized in नेवाः